"საქართველოს განვითარების ბანკი" კომერციული ბანკების კონკურენტი არ უნდა გახდეს“, - განცხადება ამის შესახებ ეკონომიკისა და მდგრადი განვითარების მინისტრმა გიორგი კვირიკაშვილმა გააკეთა.

მისი განმარტებით, "საქართველოს განვითარების ბანკი" საქართველოში საპარტნიორო ფონდის რეორგანიზაციის შედეგად ჩამოყალიბდება.

"ერთმნიშვნელოვნად მინდა ვთქვა, რომ "საქართველოს განვითარების ბანკი" არ უნდა გახდეს კომერციული ბანკების კონკურენტი. ძალიან ბევრს ვმუშაობთ, რომ მანდატი, რომელიც ამ ინსტიტუტს ექნება, იყოს აბსოლუტურად განსხვავებული კომერციული საბანკო ინსტიტუტისგან. რაც შეეხება საკითხს, რატომ გაჩნდა მისი ჩამოყალიბების ინიციატივა, ამ ტიპის ინსტიტუტი არსებობს ძალიან ბევრ ქვეყანაში, არის ბევრი წარმატებული მაგალითი. უმნიშვნელოვანესია, რომ სწორად გაივლოს ხაზი საბაზრო და არასაბაზრო პროდუქტებს შორის, არ გადაიკვეთოს ეს ხაზი არსებულ საბანკო სისტემასთან. ეს არის ჩვენი ამოცანა. არ მგონია, ეს ინსტიტუტი გახდეს რაიმე პრობლემა საბანკო სისტემის განვითარებისთვის",-განაცხადა კვირიკაშვილმა.

რაც შეეხება გავრცელებულ ინფორმაციას, რომ დაწესებულებას დავით საგანელიძემ უნდა უხელმძღვანელოს, კვირიკაშვილი პასუხობ - "არის ამაზე საუბარი, წინასწარ ვერ გეტყვით, იმიტომ, რომ ეს არ არის ჩემი გადასაწყვეტი".