თამარ სანიკიძესა და პედაგოგებს შორის შეხვედრა უშედეგოდ დასრულდა

საზოგადოება - 17:36, 08 Apr, 2014

2031

საქართველოს განათლებისა და მეცნიერების მინისტრ თამარ სანიკიძესა და #53-ე სკოლის პედაგოგებს შორის შეხვედრა დასრულდა.

როგორც შეხვედრის შემდეგ პედაგოგებმა განაცხადეს, მათი გამოიტანეს დასკვნა, რომ მინისტრი შეცდომაში ჰყავთ შეყვანილი. მათი თქმით, თამარ სანიკიძისგან მიიღეს დაპირება, რომ მინისტრი შექმნილ სიტუაციაში გაერკვევა.

"შევხვდით თამარ სანიკიძეს. შეხვედრა იყო დაძაბული. ჩვენ ასეთი დასკვნა გამოვიტანეთ, რომ მინისტრი შეჰყავთ შეცდომაში, რადგან გენინსპექციის დასკვნაში არის შეცდომები. მინისტრმა გვითხრა, რომ გაერკვეოდა სიტუაციაში. თუმცა ამ წუთას ის დირექტორის გათავისუფლების შესახებ გადაწყვეტილებას არ ცვლის. ჩვენ მინისტრს მოთხოვნები წავუყენეთ და ვუთხარით, რომ თუ არ მოხერხდებოდა ამ მოთხოვნების დაკმაყოფილება, აუცილებლად მივმართავთ პრემიერ-მინისტრს და მოვითხოვთ განათლებისა სამინისტროს მუშაობის შესწავლას. ასევე აუცილებლად მოვითხოვთ სახელმწიფო აუდიტის შესვლას განათლების სამინისტროში. ჩვენ აგრეთვე მივმართავთ პრემიერ-მინისტრს, პრეზიდენტს, არასამთავრობო ორგანიზაციებს, სახალხო დამცველს და არასამთავრობო ორგანიზაცია "მოქალაქეს“, - განაცხადეს პედაგოგებმა შეხვედრის შემდეგ.

როგორც პედაგოგებმა აღნიშნეს, ისინი არ აპირებენ სკოლაში შეუშვან ახლად დანიშნული დირექტორი და მათ თქმით, ამის იურიდიული უფლება აქვთ.

"გვაქვს უფლება, არ მივიღოთ ახალი დირექტორი. ჩვენ მივწერეთ განათლებისა სამინისტროს და მოვითხოვეთ მედიატორი. ჩვენთან სკოლაში მედიატორი არ გამოცხადებულა. სახელმწიფომ უკვე იცის, რომ #53-ე სკოლა გაფიცულია და სკოლა იყენებს კონსტიტუციურ უფლებას. სწორედ ამის საფუძველზე შეგვიძლია სკოლაში არ შევუშვათ მოვალეობის ახალი შემსრულებელი", - განაცხადეს პედაგოგებმა.

მათივე თქმით, სასწავლო პროცესი ამ ეტაპზე სკოლაში არ აღდგება.