აქციის მონაწილე მძღოლებსა და გუბერნატორს შორის დიალოგი არ შედგა

საზოგადოება - 18:07, 05 Apr, 2014

1894

პარტია "ქართული ოცნების" ცენტრალური ოფისის წინ მიმდინარე მძღოლების აქციაზე ქვემო ქართლის გუბერნატორი გიორგი მღებრიშვილი მივიდა. ადგილზე შეკრებილებს გუბერნატორმა მოლაპარაკებები შესთავაზა, თუმცა ისინი დიალოგზე უარს აცხადებენ და ჩატარებული ტენდერი გაუქმებას მოითხოვენ.
ქვემო ქართლის გუბერნატორმა მათ ტენდერის გაუქმების პირობა ვერ მისცა, თუმცა პირობა მისცა, რომ მათ უმუშევრად დარჩენა არ ემუქრებათ.
მძღოლები, რომლებიც უკვე რამდენიმე დღეა აქციებს მართავენ, მგზავრთა გადაყვანაზე გამოცხადებულ კონკურსში გამარჯვებულ კომპანია "ინტერტრანსს" კახა კალაძეს სახელს უკავშირებენ.
აქციაზე მყოფი ერთ-ერთი მძღოლის თქმით, კალაძემ აღნიშნული კომპანია ტენდერისთვის ჩამოაყალიბა და ფეხბურთელებით დააკომპლექტა.
„ეს იყო კრიმინალური ტენდერი, რომელსაც კახი კალაძე ხელმძღვანელობდა. მან შექმნა ფეხბურთელებისგან ფირმა. ამ ფირმას მიაღებინა კონსურსში მონაწილეობა და ყალბი მილიონ 650 000 ლარის საბანკო გარანტია გასცა. ამ ყველაფერში ხელი რუსთავის მერმაც შეუწყო“, - განაცხადა ერთ-ერთმა მძღოლმა.
მძღოლები რუსთავი-თბილისის ხაზზე ყვითელი ავტობუსების შესვლას აპროტესტებენ. მათი თქმით, ამ შემთხვევაში ისინი სამსახურის გარეშე დარჩებიან.
მძღოლების პროტესტს ენერგეტიკის მინისტრი კახა კალაძეც გამოეხმაურა. კალაძე რუსთავი-თბილისის სამარშრუტო ტაქსების მძღოლთა საპროტესტო გამოსვლებს „დადგმულ შოუს“ უწოდებს.
როგორც კალაძემ ჟურნალისტებს განუცხადა, აქციები მართული პროცესია და ის ამაში მონაწილეობას არ მიიღებს.
"ქართული ოცნების" ოფისთან, სადაც აქცია ამ წუთებშიც გრძელდება, ადგილზე საპატრულო პოლიციაა მობილიზებული.