აჭარაში საქართველოს პრემიერ-მინისტრის სამუშაო შეხვედრების პარალელურად, მთავრობის კანცელარიის უფროსის მოადგილემ ნინო კობახიძემ ბათუმის შოთა რუსთაველის სახელმწიფო უნივერსიტეტის სტუდენტებს ირაკლი ღარიბაშვილის საგანმანათლებლო ინიციატივები გააცნო.

ნინო კობახიძემ პრეზენტაციისას თითოეული ინიციატივა დეტალურად განმარტა და აღნიშნა, რომ განათლება საქართველოს მთავრობის ერთ-ერთი უმთავრესი პრიორიტეტია.

როგორც მთავრობის პრესსამსახურიდან „ნიუპოსტს“ აცნობეს, პრემიერ-მინისტრის საგანმანათლებლო ინიციატივებმა, რომლებიც საერთაშორისო განათლების ცენტრის შექმნას, საჯარო სამსახურში წარჩინებული სტუდენტების სტაჟირებასა და სოციალურად დაუცველი სტუდენტებისთვის საერთო საცხოვრებლის აშენებას გულისხმობს, სტუდენტების დაინტერესება გამოიწვია.

პრეზენტაციას ბათუმის შოთა რუსთაველის უნივერსიტეტის 200-მდე სტუდენტი დაესწრო. მათ მთავრობის კანცელარიის უფროსის მოადგილეს შეხვედრისთვის მადლობა გადაუხადეს და განაცხადეს, რომ პრემიერ-მინისტრის ინიციატივები სტუდენტებს დამატებით სტიმულს და მოტივაციას აძლევს.

შეხვედრა ინტერაქტიულ რეჟიმში წარიმართა და პრეზენტაციის შემდეგ ნინო კობახიძემ სტუდენტების ყველა კითხვას უპასუხა.

ნინა გოლოშვილი