მაღლივ კორპუსთან მეტროსადგური აშენდება

საზოგადოება - 12:25, 01 Apr, 2014

1546

საქართველოს მუნიციპალური განვითარების ფონდის ხელმძღვანელის ელგუჯა ხოკრიშვილის განცხადებით, თბილისში უნივერსიტეტის მაღლივ კორპუსთან ახალი მეტროსადგურის მშენებლობაზე ტენდერი უახლოეს მომავალში გამოცხადდება.
ხოკრიშვილის თქმით, მუნიციპალური განვითარების ფონდმა მშენებლობის პროექტთან დაკავშირებული სამმხრივი მოლაპარაკებები გუშინ დაასრულა, რომელსაც ფონდი თბილისის მეტროპოლიტენსა და ესპანურ კომპანია "ევროსტუდიოსთან" აწარმოებდა.
"მოლაპარაკების დასრულებისა და პროექტის ირგვლივ მიღწეული შეთანხმების დასადასტურებლად, საქართველოში აზიის განვითარების ბანკის წარმომადგენელი ჩამოვიდა. თბილისის მეტროპოლიტენის ახალი სადგურის მშენებლობას სწორედ აზიის განვითარების ბანკი აფინანსებს. მხარეებს შორის შეთანხმება საქართველოს მუნიციპალური განვითარების ფონდს აძლევს შესაძლებობას, მეტროსადგურის მშენებლობაზე ტენდერი გამოაცხადოს“, - განაცხადა ხოკრიშვილმა და დასძინა, რომ ახალი სადგურის მშენებლობაზე ტენდერი უახლოეს დღეებში გამოცხადდება.
მისივე თქმით, სრული პროექტი და სატენდერო პაკეტი ორშაბათს მზად იქნება, რომელიც საბოლოოდ, შესათანხმებლად მერიას გადაეგზავნება, რის შემდეგაც აზიის განვითარების ბანკის პროექტი დამატებით შემოწმებას კიდევ ერთხელ გაივლის.
ხოკრიშვილის განმარტებით, პროექტის ღირებულება კონფიდენციალურია, თუმცა ღირებულება სავარაუდოდ 35-42 მილიონი ევროს ფარგლებში იქნება. მისივე თქმით, პროექტი 2 წელში უნდა დასრულდეს, რის შემდეგაც, ის მერიის სატრანსპორტო სამსახურს გადაეცემა და მერია მიიღებს გადაწყვეტილებას, თუ რა სახელი დაერქმევა ახალ სადგურს. პროექტს აზიის განვიარების ბანკი აფინანსებს, სახელმწიფოს თანადაფინანსება კი 15 პროცენტს შეადგენს.