IRI-მ ბიძინა ივანიშვილის ერთი გადაწყვეტილება გამოიკვლია

საზოგადოება - 09:36, 01 Apr, 2014

1804

IRI-ს კვლევების მიხედვით, მოსახლეობის 48 პროცენტი მიიჩნევს, რომ საქართველოში უმუშევრობა კვლავაც რჩება პრობლემად. ეს მონაცემი 70 პროცენტს აღწევს პრობლემების მეორედ ჩამონათვალში. ქვეყნის წინაშე მდგარ სხვა გადაუწყვეტელ პრობლემებს შორის დასახელებულია ასევე დაკარგული ტერიტორიები - 19 პროცენტი (მეორედ დასახელებული მაჩვენებელი 41 პროცენტი) და ეკონომიკური სიტუაციაა - 15 პროცენტით (მეორედ დასახელებული მაჩვენებელი 38 პროცენტი). საინტერესოა, რომ რუსეთთან ურთიერთობას მთავარ გადაუწყვეტელ საკითხად გამოკითხულთა მხოლოდ 2 პროცენტი ასახელებს. IRI-ს კვლევებში ქალაქებსა და სოფლებში მთავარ გადაუწყვეტელ საკითხებს შორის ისევ უმუშევრობა სახელდება - 41 პროცენტი. გარკვეული პაუზის შემდეგ მეორე პოზიცია დაიკავა გზების საკითხმა, რომელიც გამოკითხულთა 10 პროცენტს აწუხებს, 9 პროცენტი კი მთავარ პრობლემად სასმელ წყალს ასახელებს. ომის საფრთხისადმი შიში შარშანდელთან შედარებით რამდენიმე პუნქტით გაიზარდა. ახლა გამოკითხულთა 24 პროცენტს აწუხებს ეს საფრთხე. სხვადასხვა საკითხებს შორის, IRI-მ კვლევაში შეიტანა ბიძინა ივანიშვილის გადაწყვეტილება - დატოვოს პოლიტიკა და გადავიდეს სამოქალაო სექტორში. გამოკითხულთა 36 პროცენტი შეიძლება ითქვას, რომ ყოფილი პრემიერის ამ გადაწყვეტილებას კატეგორიულად არ იზიარებს. ივანიშვილის გადაწყვეტილებას სრულად მხოლოდ გამოკითხულთა 19 პროცენტი იზიარებს.