"ქართული ოცნება-დემოკრატიული საქართველოს" ლანჩხუთის რაიონული ორგანიზაციის ახლადდანიშნული თავმჯდომარე გიორგი ხელაძე ადასტურებს ინფორმაციას იმის შესახებ, რომ პარტიაში ხელფასებს არ უხდიან. ამის შესახებ „გურია ნიუსი“ იუწყება.

„თუ არ ვცდები, ორი თვეა არ დარიგებულა. მე 10 დღეა, რაც დანიშნული ვარ, დავაზუსტებ და გეტყვით,“ - განუცხადა „გურია ნიუსს“ გიორგი ხელაძემ.

ლანჩხუთის რაიონული ორგანიზაციის ყოფილმა თავმჯდომარე გიორგი გეგიაძემ კი „გურია ნიუსს“ განუცხადა: „ვერ გეტყვით, რა არის ამის მიზეზი. ველოდებით ყოველდღე , მაგრამ ჯერჯერობით არ არის, დაახლოებით 2-თვე-ნახევარია, რაც ვიმუშავეთ და ასაღები გვაქვს, მაგრამ არ ვამბობთ რა, ბოდიშს გიხდით, ყველაფერზე გვედავებიან და მაგაზეც შემოგვედავებიან ახლა, ისე ვატყობ. ისედაც გადამტერებული მყავს ყველა“.

ირაკლი კუჭავა, პარტია "ქართული ოცნება-დემოკრატიული საქართველოს" ჩოხატაურის რაიონული ორგანიზაციის თავმჯდომარე კი აცხადებს: "არაფერი, რა ხელფასებზეა საუბარი, ჩვენთან არც უნდა დარიგებულიყო, ცენტრალური ოფისი არეგულირებს ცენტრალიზებულად ფინანსებს, ჩვენი საოფისე ფართის გადასახადისა თუ კომუნალური გადასახადების დაფარვას. ჯერ საარჩევნო რეჟიმი არ დაწყებულა და შესაბამისად, არც ხელფასებზე უნდა ყოფილიყო საუბარი. არ მესმის, ვინ თქვა ეგ."

პარტია "ქართული ოცნება-დემოკრატიული საქართველოს" ოზურგეთის რაიონული ორგანიზაციის თავმჯდომარე დავით დარჩია "გურია ნიუსთან" ადასტურებს აღნიშნულ ინფორმაციას. „არ ვიცი, ნამდვილად არ ვიცი ამის შესახებ, რა გითხრათ. - ბატონო დავით, არ მოიკითხეთ, რა არის ამის მიზეზი? - ჰო, მაგრამ ალბათ, იქაც არ იციან ზუსტი პასუხი, როდის იქნება, - განაცხადა დარჩიამ.

პარტია "ქართული ოცნება - დემოკრატიული საქართველოს" გურიის კოორდინატორის გოჩა მეგრელიშვილის თქმით, დავალიანებები უახლოეს მომავალში ანაზღაურებული იქნება. - პარტია გადასახადს აუცილებლად გადაიხდის, - განუცხადა „გურია ნიუსს“ გოჩა მეგრელიშვილმა.

წყარო: gurianews.com