გადარჩენილის ოჯახი სოციალური ქსელით გადამრჩენელს ეძებს

შემთხვევა - 11:26, 31 Mar, 2014

15848

პიროვნების ვინაობა, რომელიც მტკვარში ავარიის შემდეგ გადავარდნილი მამაკაცის გადასარჩენად გადახტა, ამ დრომდე უცნობია. მას სოციალური ქსელის მეშვეობით გადარჩენილის ოჯახი ეძებს.
ავარია თბილისში, სანაპიროზე, ყოფილი კორტების მიმდებარე ტერიტორიაზე გუშინწინ, დაახლოებით 04:00 საათზე მოხდა. ერთმანეთს სამი მანქანა შეეჯახა, მათგან ერთ-ერთი „ჯიპი“ კი ჯებირს შეასკდა და გაანგრია.
თუმცა, თავად მანქანა მტკვარში გადავარდნას გადაურჩა. მდინარეში გადავარდა მანქანაში მყოფი პირი, რომლის გადასარჩენად მტკვარში მაშინვე გადახტა ავარიის თვითმხილველი უცნობი მამაკაცი. რამდენიმე წუთში ადგილზე სამაშველო სამსახურის ჯგუფი მივიდა და ორივე ნაპირზე ამოიყვანა.
„ფეისბუქში" გავრცელებულ ფოტოზე სწორედ ის მანქანაა აღბეჭდილი, საიდანაც მგზავრი მდინარეში გადავარდა. ავარიის შესახებ გავრცელებული ინფორმაციის ქვემოთ კომენტარების ველში, ასეთი ჩანაწერია: „დიდი მადლობა მინდა გადავუხადო უცხო ადამიანს, რომელმაც გადამირჩინა შვილი... ამას ყველა არ გააკეთებდა... სამწუხაროდ, არ ვიცი მისი არც სახელი, არც გვარი... დიდი მადლობა, თქვენ რომ არა, არ ვიცი რა მოხდებოდა...
ნინა შადური
წყარო: „რეპორტიორი“