პრემიერი პირველი პრეზიდენტის ღვაწლს იხსენებს

საზოგადოება - 10:31, 31 Mar, 2014

2287

საქართველოს პრემიერ-მინისტრი ირაკლი ღარიბაშვილი ზვიად გამსახურდიას 75 წლისთავს ეხმაურება.
"დღეს საქართველოს პირველ პრეზიდენტს ზვიად გამსახურდიას დაბადებიდან 75 წელი შეუსრულდებოდა.
დიდია მისი ღვაწლი საქართველოს ეროვნულ-განმათავისუფლებელ მოძრაობასა და ქვეყნის სახელმწიფოებრივი დამოუკიდებლობის მიღწევის საქმეში.
ზვიად გამსახურდია განასახიერებდა და მეთაურობდა იმ ეროვნულ ძალებს, რომლებსაც წილად ხვდათ გამარჯვება 70-წლიანი საბჭოთა მმართველობისას ჩატარებულ პირველ მრავალპარტიულ, დემოკრატიულ არჩევნებში.
მაშინ საზოგადოებამ ერთსულოვნად დაუჭირა მხარი ეროვნულ ძალებს და ამით გამოხატა თავისი მტკიცე ნება, რომლის გაყალბებაც ვერავინ გაბედა. ზვიად გამსახურდიას დამსახურებაა 1991 წლის 31 მარტის რეფერენდუმი, რომლის შედეგადაც საქართველოს მთელმა მოსახლეობამ, აფხაზი და ოსი თანამოძმეების ჩათვლით, ხმა მისცა საქართველოს სახელმწიფოებრივ დამოუკიდებლობას. ამის საფუძველზე 1991 წლის 9 აპრილს ზვიად გამსახურდიას თაოსნობით საქართველომ დამოუკიდებლობის აღდგენა გამოაცხადა.
ზვიად გამსახურდიას სახელი ყოველთვის იქნება დაკავშირებული ეროვნულ იდეასთან, საქართველოს დამოუკიდებლობის აღდგენასა და ჩვენი ქვეყნის ისტორიაში ახალი ერის დაწყებასთან“, - აღნიშნულია პრემიერის განცხადებაში.

ნინა გოლოშვილი