ფინანსური მონიტორინგის სამსახური ეროვნული ბანკიდან ფინანსთა სამინისტროს დაქვემდებარებაში აღარ გადავა.

ამის შესახებ ჟურნალისტებს ფინანსთა მინისტრმა ნოდარ ხადურმა "ექსპო ჯორჯიაში" განუცხადა, სადაც საერთაშორისო კონფერენცია "ეკონომიკური ინტეგრაცია ევროკავშირთან - პერსპექტივები და შესაძლებობები" მიმდინარეობს.

მისი განმარტებით, გადაწყვეტილება ფინანსთა სამინისტროსთან ინტერესთა კონფლიქტის გამორიცხვის მიზნით იქნა მიღებული.

"თავიდანვე იყო რამდენიმე ალტერნატივა, ჩვენთვის ძალიან მნიშვნელოვანია ამ სამსახურის დამოუკიდებლობა. დღესაც ეს სამსახური ანგარიშვალდებულია პრემიერის წინაშე, უზრუნველყოფილი იქნება მისი დამოუკიდებლობის ხარისხი. თუმცა, მთავრობის კანონპროექტის ავტორებთან კონსულტაციის შედეგად მიღებული იქნა გადაწყვეტილება, რომ იმის გამო, რომ გამოირიცხოს ინტერესთა კონფლიქტი ფინანსთა სამინისტროში, სჯობს ეს სამსახური იყოს საქართველოს მთავრობის დაქვემდებარებაში", - განაცხადა ნოდარ ხადურმა.