პროკურატურაში სააკაშვილის დაბარებასთან დაკავშირებით, აქცია და კონტრაქცია გაიმართება

საზოგადოება - 10:27, 27 Mar, 2014

2161

დღეს, პროკურატურასთან საქართველოს ექსპრეზიდენტის მხარდამჭერი აქცია ,"მე დღეს მიშა ვარ, მეც დამკითხეთ" გაიმართება.
აქციას ორგანიზებას რამდენიმე არასამთავრობო ორგანიზაცია გაუწევს. აქციის ორგანიზატორების შეფასებით, პროკურატურაში მიხეილ სააკაშვილის დაბარება ვლადიმერ პუტინის დაკვეთაა მთავრობის მიმართ, რადგან მიხეილ სააკაშვილი „მსოფლიო დონის ლიდერია“.
"ჩვენ მივიჩნევთ, რომ ეს არის მიზანმიმართული კამპანია ბატონ მიხეილ სააკაშვილის დისკრედიტაციის მიზნით, ამიტომ სოლიდარობას ვუცხადებთ მას როგორც რეფორმატორს, პრეზიდენტს და ევროპული მომავლის ნომერ პირველ იდეოლოგს", - აცხადებენ ორგანიზატორები და მოუწოდებენ მოქალაქეებს, რომ მიხეილ სააკაშვილს სოლიდარობა გამოუცხადონ.
აქციის ორგანიზატორები არიან არასამთავრობო ორგანიზაციები "ლაზარე", "ახალგაზრდები ევროპული მომავლისთვის" და "პიკასოს კლუბი".
აქცია მთავარ პროკურატურასთან დღეს, 12:00 საათზე დაიწყება. პარალელურად, სოციალურ ქსელში დაანონსდა კონტრაქცია, რომელსაც საზოგადოების წევრები და სხვადასხვა არასამთავრობო ორგანიზაციის წარმომადგენლები გამართავენ.
საქართველოს ექსპრეზიდენტი მიხეილ სააკაშვილი პროკურატურაში დღეს მოწმის სახით არის დაბარებული. მან პასუხები ბადაშვილის უწყებას 10 საკითხთან დაკავშირებით უნდა გასცეს.