რა ფილმის ნახვას ურჩევს გოგი გვახარია ბიძინა ივანიშვილს

საზოგადოება - 14:10, 21 Mar, 2014

8306

პუბლიცისტი გოგი გვახარია ყოფილ პრემიერ-მინისტრს ბიძინა ივანიშვილს მიმართავს და ფილმის "მოქალაქე კეინის" ნახვას ურჩევს.
"რაც შეეხება "პირველ მოქალაქეს". მე ვინ მეკითხება, მაგრამ მას დღეს ყველა დროის საუკეთესო ფილმის, "მოქალაქე კეინის" ნახვას ვურჩევდი. რატომ? როგორც ქართველი პოეტი იტყოდა - იმიტომ,“ - წერს გვახარია „რადიო თავისუფლებაზე“ გამოქვეყნებულ ბლოგში.
გვახარია საკუთარ ბლოგში ასევე “ქართული ოცნების” ლიდერებს მიმართავს.

„ვიცი, რომ უმრავლესობა მორწმუნედ და ეკლესიურად თვლით თავს. სპეცსაშვებიც მშვენივრად შეირგეთ და გადასარევად გაემართეთ ურიგოდ გაბრიელ ბერის საფლავის მოსალოცად (თუ ტერმინები მეშლება, მაპატიეთ, მცირედმორწმუნე ცოდვილი ვარ და თქვენ როგორ შეგედრებით). ჰოდა გაგიათ ალბათ, ერთი სიბრძნე “თავისუფლებისთვის ხართ, ძმანო, ხმობილნი” და “ნუ გახდებით მონები კაცისა”. იცით, რატომ გაგვაფრთხილეს ასე? იმიტომ, რომ თავისუფლება არის ბედნიერება და უბედურია ის, ვისაც არასდროს უგრძვნია თავისუფლების სიტკბო.
რაც მთავარია, ჩემგან არ გესწავლებათ ალბათ, რომ პირმოთნეობა, ლაქუცი და მლიქვნელობა სულაც არ ნიშნავს სიყვარულს და ერთგულებას... და არავის, არავის ამ ქვეყანაზე, მათ შორის ყველაზე ჩამოყალიბებულ გიჟუასაც კი, არ უყვარს მონები. შესაძლებელია გამოიყენონ, გაერთონ, ისიამოვნონ კიდეც მათი ყალბი ერთგულებით, მაგრამ ადამიანს მაინც თავისუფლება იზიდავს, იმის აზრი აინტერესებს, ვინც სიმართლეს ეუბნება, ბრაზდება მასზე, შეიძლება მისი განადგურებაც კი მოითხოვოს, მაგრამ პატივს სცემს თავისუფლებას და არა მონობას. დაფიქრდით აბა? თქვენ თავადაც არ გირჩევნიათ თავისუფალი ხალხი ერთგულ მოსამსახურეს?“, - წერს გვახარია.