დემოგრაფი "ნაციონალებს" შობადობის სტატისტიკის გაყალბებაში ამხელს

საზოგადოება - 11:07, 21 Mar, 2014

1584

დემოგრაფი ანზორ თოთაძე, რომელიც დემოგრაფიული განვითარების ფონდის ერთ-ერთი დამფუძნებელია, აცხადებს, რომ „ნაციონალებმა“ შობადობის სტატისტიკა გააყალბეს.
აღნიშნული შესახებ ანზორ თოთაძე გაზეთ „ვერსიას“ ესაუბრა.
თოთაძე აცხადებს, რომ საქართველოში ბოლო 9 წლის განმავლობაში დემოგრაფიული პოლიტიკა არ გატარებულა, ხოლო 2008 წელს შობადობის მაღალი მაჩვენებლის დაფიქსირებას, "ნაციონალების" მიერ გაყალბებული შობადობის სტატისტიკით ხსნის.
"2008 წლის შემდეგ სამოქალაქო სექტროს სათავეში გიორგი ვაშაძე ედგა. მაშინ გააკეთეს ისე, თითქოს საქართველოში შობადობა 2009 წელს 7000-ით გაიზარდა. რა დროიდანაც ჩვენს ქვეყანაში აღრიცხვა წარმოებს, ეს ციფრი მაქსიმუმ 500-1000 იყო და მოსახლეობის მსგავსი მატება არასორდეს დაფიქსირებულა. ეს გახლდათ მაამებელი პოლიტიკა, რომელიც იმისთვის გაატარეს, მერე პრეზიდენტს ეთქვა, შობადობის ბუმიაო. როგორ შეიძლება, ომისა და კრიზისის დროს ამხელა მატება ყოფილიყო?“, - ამბობს ანზორ თოთაძე.

მისივე თქმით, როდესაც აღნიშნულის მერე „განგაში ატეხა“, „ნაციონალებმა“ უკან დაიხიეს და 63 ათასი დაბადებულიდან მომდევნო წლებში 57 ათასზე ჩამოვიდნენ, თუმცა თოთაძის თქმით, ესეც არასწორი ციფრები იყო.
დემოგრაფი მიესალმება პრემიერ ირაკლი ღარიბაშვილის ინიციატივას და ამბობს, რომ როდესაც დემოგრაფიული პრობლემების სამთავრობო დონეზე გადაწყვეტა ხდება, ეს მისასალმებელია.

შეგახსენებთ, რომ ახალი სახელმწიფო პროგრამა რომელიც ყოველ მესამე შვილზე ფულად დახმარებას ითვალისწინებს, რიგ რეგიონებში 2014 წლის 1 ივნისის შემდეგ დაბადებულ ბავშვებზე ამოქმედდება.