"მოუბოდიშა - დედი, შეგაწუხე ჩემი პრობლემებითო" - რატომ მოიკლა თავი 15 წლის გოგონამ

შემთხვევა - 10:17, 20 Mar, 2014

9591

წყალტუბოს რაიონში მომხდარი თვითმკვლელობის შესახებ "კვირის პალიტრა" გარდაცვლილის მეზობელს, მ.დ.-ს ესაუბრა.

- თიკო ხონიდან იყო და სოფელში იზრდებოდა, ბებია-ბაბუასთან. უპატიოსნესი, ზრდილობიანი ბავშვი იყო. ამ უბედურ დღეს ერთად ვიმგზავრეთ ქუთაისიდან 4 საათიანი ავტობუსით. არაფერი შემიმჩნევია, მხიარული იყო, როგორც ყოველთვის.

- უმეტესწილად ამ ხნის გოგონები შეყვარებულის გულისთვის დგამენ ასეთ ნაბიჯს. აქაც იგივე პრობლემა ხომ არ იყო?

- თიკოს არავითარი პრობლემა არ ჰქონია. თითით საჩვენებელი ოჯახი ჰყავდა. თავს ევლებოდნენ ბებია და ბაბუა. რამე რომ შემთხვეოდა ბავშვს, ვინმე შეამჩნევდა, სოფელს ხომ იცით, არაფერი გამოეპარება. ამბობენ, რომ ეს ყველაფერი გარდატეხის ასაკის ბრალი იყო. თქვეს, ქალური პრობლემები ჰქონდა და ამან ძლიერი თავის ტკივილები გამოიწვიაო. ამაზე თვითმკვლელობამდე დედასთანაც უსაუბრია.

- საინფორმაციო სააგენტოები წერდნენ, რომ თიკას დედასთან საუბრის დროს უთქვამს, უღირსი შვილი ვარო. ამის შემდეგ კი გასულა და თავი მოუკლავს, რას ამბობენ ამაზე ოჯახის წევრები?

- არა, ამის შესახებ მის ძმას ვკითხე და მითხრა, ჩემს დას ასეთი არაფერი უთქვამსო. როგორც მისი ძმა ამბობს, თიკოს ძლიერი თავის ტკივილები აწუხებდა, რაზეც დედასაც შესჩივლა თურმე. ბოლოს მოუბოდიშებია, დედი, შეგაწუხე ჩემი პრობლემებითო, ამდგარა, ძმისთვის კომპიუტერი დაუთმია და გარეთ გასულა. ბოლოს ისევ დედას მოუკითხავს თიკო, შვილისთვის უთქვამს, დამალაპარაკეო. ძმას ძებნა დაუწყია მაგრამ ვერსად უნახავს ბავშვი. ბოლოს სახლის უკან, ტყემლის ხეზე უნახავს ჩამოკიდებული. საწყალს იმ დროს დამლაპარაკებელი, რომ ჰყოლოდა, შეიძლება ამ უბედურების მომსწრე არ გავმხდარიყავით.

- ურთიერთობა, როგორი ჰქონდათ მშობლებს. ოჯახში ხომ არ იყო რამე პრობლემა, რაც ბავშვს სუიციდისკენ უბიძგებდა?

- ურთიერთობა ჩვეულებრივი ჰქონდათ. ძალიან კარგი ადამიანია დედამისი, უცხოეთში იმის გამო წავიდა, რომ ოჯახში ვალი დაგროვდა. მამა ხონში ცხოვრობს და ისიც კარგი პიროვნებაა. ამ კუთხით თიკოს არანაირი მიზეზი არ ჰქონდა, თავი მოეკლა.

წყარო: კვირის პალიტრა

http://www.kvirispalitra.ge/public/21015-qmoubodisha-dedi-shegatsukhe-chemi-problemebithoq-ratom-moikla-thavi-15-tslis-gogonam.html