მოქანდაკე ზურაბ წერეთელის თანაშემწე უარყოფს გავრცელებულ ინფორმაციას იმის შესახებ, რომ წერეთელმა პუტინისადმი მხარდამჭერ წერილს ხელი მოაწერა.

თანაშემწის განცხადებით, მოქანდაკე მოსკოვში არ იმყოფება და მას მსგავსი წერილისთვის ხელი არ მოუწერია.

„თვითონ არც არის მოსკოვში, ხელიც არ მოუწერია, საერთოდ ის არასდროს არ ერეოდა, არც ერევა და არც უნდა, რომ ჩაერიოს პოლიტიკაში ის ყოველთვის პოლიტიკისგან შორს დგას, ემსახურება მხოლოდ ხელოვნებას და არის მხოლოდ ხელოვნების მოღვაწე, ამით უკვე ყველაფერია ნათქვამი“, - განაცხადა წერეთელის თანაშემწემ.

ცნობისთვის, კრემლის აგრესიული კურსის ღია მხარდაჭერის გამო ქართულმა მხარემ თბილისში ბეზრუკოვის სპექტაკლი გააუქმა.

გავრცელებული ინფორმაციით, რუსული ელიტის ნაწილმა მათ შორის ნიკოლოზ ცისკარიძემ, ზურაბ წერეთელმა და თავად ბეზრუკოვმა გაავრცელეს მიმართვა, რომელშიც ნათქვამია, რომ მოსწონთ პუტინის პოზიცია და ამართლებენ მის ანტიუკრაინულ პოლიტიკას.

„იმ დროს როდესაც ყირიმისა და ჩვენი თანამემამულეების ბედი წყდება, კულტურის მოღვაწეები ვერ ვიქნებით გულგრილნი, მხარს ვუჭერთ რუსეთის ფედერაციის პრეზიდენტის პოლიტიკას უკრაინასა და ყირიმში“,- ნათქვამია მიმართვაში.

შეგახსენებთ, რომ თბილისში ბეზრუკოვი მაისში უნდა ჩამოულიყო, მაგრამ კულტურის პალატამ დაგეგმილი ღონისძიება ამ ინფორმაციის გავრცელებიდან რამდენიმე საათში გააუქმა.

„ეს რუსი იქნება, ფრანგი თუ ამერიკელი ამას არ აქვს მნიშვნელობა, მე არასოდეს არც ერთ ხელოვან ადამიანს რა სფეროშიც მე ვმუშაობ, არ შევუწყობ ხელს რომ ისინი ჩამოვიდნენ...იმიტომ რომ ჩვენი ტერიტორიებიც არის ოკუპირებული და ეს იმას ნიშნავს რომ ამ ადამიანების აქ ჩამოსვლით ჩვენ ხმამაღლა უნდა ვაღიაროთ, რომ აფხაზეთი და ოსეთი რუსეთისაა“,- განაცხადა კულტურის პალატის დირექტორმა დავით ოქიტაშვილმა.

ნინა შადური