სრულიად საქართველოს კათოლიკოს-პატრიარქი თანმხლებ პირებთან ერთად სტამბულიდან თბილისში ჩარტერული რეისით ჩამოფრინდა.

უწმინდესს აეროპორტში მრევლი და სასულიერო პირები დახვდნენ. სტამბულში მყოფი საქართველოს ეკლესიის დელეგაციის წევრების ნაწილი თბილისში გუშინ ჩამოფრინდა, მათ შორის, პროტოპრესვიტერი გიორგი ზვიადაძე.

მან ჟურნალისტებთან საუბრისას მსოფლიო მართლმადიდებელი ეკლესიის მეთაურთა შეკრებაზე გააკეთა კომენტარი.

მისი თქმით, ამ შეკრებაში უწმინდესის მონაწილეობას დიდი მნიშვნელობა ჰქონდა. პატრიარქმა მართლმადიდებელი ეკლესიის დაცვის მიზნით, ისეთი სიმტკიცით დააყენა საკითხები, რომელსაც საქართველოს ეკლესიის დელეგაციის სხვა წევრი ვერ შეძლებდა.

მისსივე თქმით, მომავალი დიდი კრების მოსამზადებელ საკითხებს შორის კათოლიკოს-პატრიარქმა შეიტანა საქართველოს მართლმადიდებელი ეკლესიის ადგილის განსაზღვრა დიპტიხში. ასევე, აფხაზეთსა და ცხინვალის რეგიონში საქართველოს მართლმადიდებელი ეკლესიის იურისდიქციის აღდგენის საკითხის განსაზღვრა.