სარფის საბაჟოზე დიდი რაოდენობით მედიკამენტების უკანონო შემოტანის რამდენიმე მცდელობა დაფიქსირდა.

შემოსავლების სამსახურის ინფორმაციით, თურქეთის მხრიდან საქართველოს მოქალაქე ე.კ. შემოვიდა, რომლის კუთვნილი ბარგის შემოწმებისას მებაჟე ოფიცრებმა 353,2 ლარის ღირებულების 1,6 კგ სხვადასხვა დასახელების არადეკლარირებული მედიკამენტი აღმოაჩინეს.

მოქალაქეს, საგადასახადო კოდექსის 289-ე მუხლის მე-14 ნაწილის შესაბამისად, სანქციის სახით 1000 ლარის ოდენობით ფულადი ჯარიმა და საქონლის ჩამორთმევა შეეფარდა.

რაც შეეხება სხვა შემთხვევებს, 5472,5 ლარის ღირებულების 5,5 კგ სხვადასხვა დასახელების მედიკამენტი აღმოჩნდა საქართველოს მოქალაქე ჯ.კ.-ის ბარგში, ხოლო ასევე თურქეთის მხრიდან შემოსული საქართველოს მოქალაქე ნ.ბ.-ის ბარგში 14 კგ სხვადასხვა დასახელების მედიკამენტი აღმოაჩინეს.

საქონლის საბაჟო ღირებულებამ 9005,94 ლარი შეადგინა.
საგადასახადო კოდექსის 289-ე მუხლის მე-10 ნაწილის შესაბამისად, ორივე პირს სანქციის სახით შეეფარდა ფულადი ჯარიმა, შესაბამისად, 5472,5 ლარისა და 9005,94 ლარის ოდენობით.

ნინა შადური