"მეცხრე არხის" ლიცენზიის გაუქმების მიზნით საჯარო ადმინისტრაციული წარმოება დაიწყო

საზოგადოება - 09:46, 10 Mar, 2014

1994

საქართველოს კომუნიკაციების ეროვნულმა კომისიამ ტელეკომპანია "მეცხრე არხის" თანამგზავრული სისიტემების გამოყენებით მაუწყებლობის ლიცენზიის გაუქმების მიზნით საჯარო ადმინისტრაციული წარმოება დაიწყო.
როგორც კომისიაში განმარტავენ, საჯარო ადმინისტრაციული წარმოების დაწყებას საფუძვლად ტელეკომპანია "მეცხრე არხის" დირექტორის ლუბა ელიაშვილის 2013 წლის 19 აგვისტოს განცხადება დაედო საფუძვლად. ტელეკომპანიის ხელმძღვანელმა საზოგადოებას არხის დახურვის გადაწყვეტილების შესახებ ამცნო და ამავე დღის 21:00 საათზე "მეცხრე არხმა" მაუწყებლობა შეწყვიტა.
როგორც კომუნიკაციების ეროვნულ კომისიაში აცხადებენ, "მაუწყებლობის შესახებ" საქართველოს კანონის თანახმად, სამაუწყებლო ლიცენზიის მფლობელის მიერ ლიცენზიით განსაზღვრული საქმიანობის შეწყვეტა წელიწადში ზედიზედ 3 თვეზე მეტი ვადით, ან ერთი წლის განმავლობაში 120 დღით, ლიცენზიის გაუქმების საფუძველი ხდება.
საკითხის ზეპირი მოსმენის სხდომა, საქართველოს კომუნიკაციების ეროვნულ კომისიაში, დღეს, 16:00 საათზე გაიმართება. საჯარო სხდომაზე მიწვეულია ტელეკომპანიის ხელმძღვანელობა და მათ საშუალება ექნებათ საკუთარი პოზიცია კომისიის წევრებს წარუდგინონ.