მთავრობის კანცელარისთან გამართულ აქციაზე, ბოლნისის რაიონიდან ჩამოსული გაფიცული მუშები ჯონდი ბაღათურიასა და დიმიტრი ლორთქიფანიძეს დაუპირისპირდნენ.

აქციის მონაწილეების უკმაყოფილება აქციაზე ოპოზიციის წარმომადგენლების გამოჩენამ გამოიწვია.

როგორც ისინი აცხადებდნენ, არ აქვთ არანაირი პოლიტიკური მოთხოვნა. მათ აქვთ შრომითი დავა და ეს არ უკავშირდება პოლიტიკას.

აქციის მონაწილეები ამბობენ, რომ ნაკლებად აინტერსებს, ვინ იქნება კანცელარიაში და მათთვის მთავარია, მოგვარდეს მათი პრობლემები. მათ ჯონდი ბაღათურიას მოსთხოვეს, აქცია დაეტოვებინა, რადგან არ სურდათ დღევანდელ აქციას რაიმე პოლიტიკური სარჩული მისცემოდა. მათ შორის მოხდა სიტყვიერი შელაპარაკება, თუმცა ოპოზიციის წარმომადგენლებმა დღევანდელი აქცია მაინც არ დატოვეს. ისინი ამ დრომდე აქციაზე იმყოფებიან.

ჯონდი ბაღათურიამ ჟურნალისტებთან საუბარში დღევანდელი ხელისუფლება გააკრიტიკა და აღნიშნა, რომ ხელისუფლება დასაქმებული ადამიანებისთვის და მათი უფლებების დაცვისთვის არაფერს აკეთებს.

ცნობისთვის, დაბა კაზრეთის საბადოს გაფიცული მუშები სამსახურში აღდგენას და შრომითი პირობების გაუმჯობესებას მოითხოვენ.

ნინა შადური