ფემინისტების აქცია ფერადი ტანსაცმლით და წითელი პომადებით, ფილარმონიიდან დაიწყება

საზოგადოება - 18:48, 06 Mar, 2014

2301

აქციის ორგანიზატორები აქცია-მსვლელობაზე დასწრების მსურველებს მოუწოდებენ ფერადი ტანსაცმლით და წითელი პომადებთ მივიდნენ, რადგან მათივე განცხადებით, აქცია ფერადი და ხმაურიანი იქნება.
„აქცია-მსვლელობა ეძღვნება ქალთა შრომითი უფლებების დაცვას, რადგან 8 მარტის დაარსება, პირველ რიგში, ქალთა შრომითი უფლებების დაცვას უკავშირდება (1857 წლის 8 მარტს ნიუ-იორკში მუშა ქალები გაიფიცნენ აუტანელი სამუშაო პირობებისა და ძალზე მწირი ხელფასის გამო. ქუჩაში გამოსული გაფიცული ქალები პოლიციამ დაარბია). მიუხედავად იმისა, რომ მას შემდეგ საუკუნეზე მეტი გავიდა, ქალთა დისკრიმინაცია შრომით ურთიერთობებში ერთ-ერთი ყველაზე დიდ პრობლემად კვლავ რჩება ქალთა უფლებების დაცვის სფეროში“,- აცხადებს ფემინისტების დამოუკიდებელი ჯგუფი.
ჯგუფის წევრები და აქციის მონაწილეები საზოგადოებას მოუწოდებენ ქალთა შრომითი უფლებების დასაცავად გაერთიანდნენ და აცხადებენ, რომ - „დროა საზოგადოებამ აღიაროს, რომ ქალისთვის მისი სქესი ხდება დისკრიმინაციის მიზეზი სამსახურში აყვანისისას, როდესაც ქალის ორსულობა ან მისი ოჯახური სტატუსი ხდება სამსახურზე უარის თქმის მიზეზი; პრობლემას წარმოადგენს: თანაბარი ანაზღაურება თანაბარი ღირებულების შრომისათვის“.
ცნობისთვის, ფემინისტების დამოუკიდებელ ჯგუფი არის არაფორმალური, არაიერარქიული და არარეგისტრირებულ ინიციატივა, რომელიც ფემინისტური იდეოლოგიის გარშემო აერთიანებს სხვადასხვა პროფესიის, ასაკის, სქესის, ორიენტაციისა და რელიგიური შეხედულების მქონე ადამიანებს საქართველოში.