ხუბუტია - ხელისუფლება ერთვება „ნაციონალების“ მიერ გაჩაღებულ ურა პატრიოტიზმის დოღში

საზოგადოება - 14:12, 06 Mar, 2014

1833

რუსეთში მოღვაწე ქართველი ბიზნესმენი მიხეილ ხუბუტია აცხადებს, რომ უკრინაში ბოლო დროს განვითარებულ მოვლენებზე ქართველი პოლიტიკოსების არაადეკვატურმა რეაგირებამ კიდევ უფრო გააღრმავა ის დაძაბულობა, რომელიც მისივე თქმით, წინა ხელისუფლების დროს განსაკუთრებულად დამანგრეველი იყო საქართველოსთვის.
ხუბუტია მიიჩნევს, რომ საქართველოს ახალმა ხელისუფლებამ, წინა ხელისუფლების მსგავსად, რუსეთისადმი მანკიერი რიტორიკა გაიმეორა.
"2013 წლის ოქტომბერში ჩატარებული არჩევნების შემდეგ, საქართველოზე მოფიქრალნი და გულშემატკივარნი ვვარაუდობდით, რომ ახალი ხელისუფლება გაანალიზებდა ”ნაციონალური მოძრაობისა” და მისი ლიდერის არასწორ ნაბიჯებს, მეზობელი რუსეთის მიმართ, რაც გააჩენდა ახალ შესაძლებლობებს დაწყებულიყო გონივრული დიალოგი საქართველოს ტერიტორიული მთლიანობისა და ახალი საგარეო პოლიტიკური კურსისადმი. სამწუხარო რეალობაა, რომ ახალმა ხელისუფლებამ შერბილებულად, მაგრამ მაინც გაიმეორა წინა ხელისუფლების მანკიერი რიტორიკა რუსეთისადმი, რომელმაც ქვეყანა მიიყვანა 3 ნაწილად დაშლამდე და პერსექტივაში კიდევ უფრო მეტ ნაწილად დაშლის საშიშროებმადე. დღეს, პოლიტიკოსების რიტორიკა კიდევ უფრო შორს წავიდა და ზოგიერთი მათგანი უკრაინაში ქართული ჯარის გაგზავნასაც კი ითხოვს და ეს მაშინ, როცა დასავლეთიც და რუსეთიც პრობლემის მშვიდობიანი გადაწყვეტისკენ მოუწოდებენ მხარეებს. როგორ ფიქრობთ, არის თუ არა ეს გამოწვევა რუსეთისათვის?! მე როგორც რიგითი ქართველს და იმ საზოგადოების წარმომადგენელს, რომელიც რუსეთში წლებია, ცხოვრობს, გული შემტკივა, რომ ახალი ხელისუფლება ხალისით ერთვება „ნაციონალების“ მიერ გაჩაღებულ ურა პატრიოტიზმის დოღში და არ ითვალისწინებს ქვეყნის წინაშე არსებულ რეალურ საფრთხეებს.
როდესაც თავისუფლების ლოზუნგისა და სხვა ქვეყნის უსაფუძვლო მოიმედეობის ფონზე, დროშების ქნევით და ფუჭი მუქარებით არის დაკავებული. ამით ისინი უკარგავენ ქვეყანას ყველანაირ პერსექტივას.

ჩემი სურვილია, დღევანდელმა ხელისუფლებამ გაანალიზოს ის ურთულესი გზაგასაყარი, რომელსაც ადგას დღეს საქართველო და გააკეთოს სწორი არჩევანი, რომელიც მომავალ თაობას მისცემს საშუალებას იცხოვროს ერთიან, ძლიერ საქართელოში. მოვუწოდებ საქართველოს ხელისუფლებას, გამონახოს ყველანაირი გზა და საშუალება და დაიწყოს დიალოგი რუსეთის უმაღლეს ხელისუფლებასთან, იმ პრობლემებზე, რომელიც ჩვენ ქვეყანას დაუგროვდა ბოლო 20 წლის მანძილზე”, - ნათქვამია მიხეილ ხუბუტიას განცხადებაში.