განათლების სამინისტრო სტიპენდიებთან დაკავშირებით განმარტებას აკეთებს

საზოგადოება - 13:18, 06 Mar, 2014

774

განათლების სამინისტრო სტიპენდიების პროგრამასთან დაკავშირებით განმარტებას აკეთებს. როგორც უწყებაში აცხადებენ, საქართველოს პრეზიდენტის გიორგი მარგველაშვილის მინისტრობის პერიოდში სტიპენდიის პროგრამის მასშტაბები გაიზარდა და განახლებული სახელწოდებით დაიწყო ფუნქციონირება.
„გიორგი მარგველაშვილმა მინისტრობის პერიოდში სტუდენტური სტიპენდიების პროგრამის მასშტაბები გაზარდა. პროგრამა 2012 წლის ბოლოს გადაიხედა და 2013 წლისთვის გაორმაგებული ბიუჯეტითა და განახლებული სახელწოდებით დაიწყო ფუნქციონირება. დღეისთვის პროგრამა ორჯერ მეტ სტუდენტს ემსახურება. ამავე პერიოდშივე მოხდა სხვა პროგრამების შინაარსის, ბიუჯეტისა და სახელწოდებების გადახედვაც, რათა უზრუნველყოფილი ყოფილიყო ამ პროგრამების მაქსიმალური ეფექტურობა. აგრეთვე, დავიწყეთ სრულიად ახალი პროგრამები, რომლის პირდაპირი ბენეფიციარებიც ჩვენი სტუდენტები არიან (ზაფხულისა და ზამთრის სკოლები, დოქტორანტების დაფინანსება, სამაგისტრო სამეცნიერო პროგრამები, ბიბლიოთეკების განახლების პროგრამები და სხვა)“,- ნათქვამია სამინისტროს განცხადებაში.

სამინისტროს ინფორმაციით, 2007 წლის პრეზიდენტის განკარგულებით განხორციელებულ პროგრამას, მას დაერქვა პრეზიდენტის სტიპენდია და ამისთვის პრეზიდენტის სარეზერვო ფონდიდან გამოიყო დაფინანსება.
„2008 წლიდან სარეზერვო ფონდიდან სტიპენდიების დაფინანსება შეწყდა. მომდევნო წლებში სტიპენდიები ფინანსდებოდა სახელმწიფო ბიუჯეტიდან (განათლებისა და მეცნიერების სამინისტროს ბიუჯეტიდან). შესაბამისად, ეს გარემოება გავითვალისწინეთ და სტიპენდიების განახლებულ პროგრამას დაერქვა სახელმწიფო სტიპენდიის პროგრამაც, რაც დაფინანსების წყაროდან გამომდინარე ადეკვატურია”, - აცხადებენ სამინისტროში.