რაში დახარჯა პრეზიდენტის ადმინისტრაციამ 53 ათასი ლარი?

საზოგადოება - 11:35, 28 Feb, 2014

2390

საქართველოს პრეზიდენტის საზოგადოებასთან ურთიერთობისა და კომუნიკაციების დეპარტამენტის უფროსის შალვა რამიშვილის ინიციატივით, პრეზიდენტის ავლაბრის რეზიდენციაში გამართული გამოფენისთვის, 53 ათასი ლარი პრეზიდენტის ადმინისტრაციამ გაიღო.
როგორც გაზეთი „ალია“ წერს, თავიდან რამიშვილს 100 ათასი ლარი მოუთხოვია, მაგრამ პრეზიდენტის ადმინისტრაციის უფროსი, ლაშა აბაშიძე მხოლოდ 30 ათას ლარზე დათანხმდა. „ამის შემდეგ საქმეში ჩაერთო პრეზიდენტის ადმინისტრაციის მძლავრი „იარაღი“, ანუ მის აღმატებულებასთან დაახლოებული ნინო ბაგრატიონი და შედეგად ჩვენმა ბიუჯეტმა თანამედროვე ხელოვნების პოპულარიზაციისთვის 53 ათასი ლარი გაიღო“ - წერს „ალია“.
გაზეთის ინფორმაციით, ავლაბრის რეზიდენციაში გამართული გამოფენა „თიბისი ბანკის“ კუთვნილმა შპს „არტარეამ“ გამართა, რომელსაც ფინანსები არ უჭირს, მაგრამ გამოფენა მაინც პრეზიდენტის ადმინისტრაციის ბიუჯეტიდან დაფინანსდა.
„ალიამ“ პრეზიდენტის პრესსამსახურს სოფო ჯაჯანაშვილს გამოფენის ხარჯთაღრიცხვა მოსთხოვა, თუმცა ჯაჯანაშვილის თქმით,- „ერევანში ვართ ყველა და რომ ჩამოვალთ ყველაფერს გაგირკვევთო“.
„ესეც მეორე პრობლემა: როცა პრეზიდენტი სადმე მიდის, მთელი პრესსამსახური დედაბუდიანად უკან მიჰყვება... დავუბრუნდეთ გამოფენას, პრეზიდენტმა განაცხადა, „ეს არის პრეზიდენტის რეზიდენცია და ის ადგილი, სადაც გვსურდა ერთ-ერთი ყველაზე მნიშვნელოვანი ტენდენციის, ქართული ნიჭიერებისა და ხელოვნების მიმართ სწრაფვის წარმოჩენა სწორედ თანამედროვე კონტექსტში“.
აკი ავლაბრის რეზიდენციაში ქართულ-ამერიკული უნივერსიტეტი განთავსდებაო? გამოდის უკვე გადაუციათ შალვა რამიშვილისთვის, რომელიც აქედან გაუწევს პოპულარიზაციას თანამედროვე ქართულ კულტურას. ახლა მკითხავთ: შალვამ რა იცის თანამედროვე კულტურისო? არა, შალვა არც ისე უნიჭო კაცია, კულტურის საკითხებში ნამდვილად ერკვევა, მაგრამ ვერ დაგიმალავთ, ფულის საკითხებში უფრო კარგად ერკვევა... - წერს გაზეთი „ალია“ დღევანდელ ნომერში.