ემზარ კვიციანი ირაკლი ალასანიას ადანაშაულებს

საზოგადოება - 13:48, 27 Feb, 2014

2643

კოდორის ხეობაში პრეზიდენტის ყოფილი რწმუნებული ემზარ კვიციანი, გაზეთ „ალიასთან“ მიცემულ ინტერვიუში თავდაცვის მოქმედ მინისტრს ირაკლი ალასანიასა და ყოფილ მინისტრს ირაკლი ოქროუაშვილს ბრალს სდებს.
როგორც „ალია“ წერს, 2006 წლამდე კვიციანი ხეობაში გასამხედროებულ რაზმს „მონადირეს“ მეთაურობდა, იმავე წელს კი, ივლისში სააკაშვილის ხელისუფლებამ მას იარაღის ჩაბარება და რაზმის დაშლა მოსთხოვა, შედეგად კვიციანმა ხელისუფლებას დაუმორჩილებლობა გამოუცხადა.

„2002 წლიდან ჯგუფი თავდაცვის სამინისტროს დაქვემდებარებაში შევიდა, თუმცა, 2005 წელს ირაკლი ოქრუაშვილმა დაშალა, რამაც ადგილობრივი მოსახლეობის უკმაყოფილება გამოიწვია. ეს გადაწყვტილება მაშინ ირაკლი ალასანიამაც გააკრიტიკა, რაც ოქრუაშვილთან დაპირისპირების მიზეზი გახდა“, - წერს „ალია“.
იმ პერიოდში ემზარ კვიციანი აცხადებდა: „ჩვენ უნდობლობას ვუცხადებთ ხელისუფლებას, ოქრუაშვილმა ჩვენს წინააღმდეგ ომი გამოცხადა და 27 ივლისს ხეობაში შემოჭრას გეგმავს. ნებისმიერი შეიარაღებული ძალა, რომელიც ხეობაში შემოვა, მოგერიებული იქნება!.“ ამის შემდეგ ირაკლი ოქრუაშვილმა შენაერთის წერვები კრიმინალურ საქმიანობაში დაადანაშაულა. ემზარ კვციანი, სამშობლოში დაბრუნების შემდეგ პროკურატურასთან თანამშრომლობას აპირებს და აცხადებს, რომ იგი პოლიტიკაში დაბრუნებას აღარ გეგმავს და სურს თავის ოჯახში მშვიდად იცხოვროს.
შეგახსენებთ, რომ ემზარ კვიციანი 2006 წლის ივლისის ბოლოდან სამხედრო ამბოხებისა და ტერორისტული აქტების მოწყობის ბრალდებით იძებნება. კვიციანი თბილისის აეროპორტში დღეს, სავარაუდოდ 16:00 საათზე ჩამოვა.
ნინა შადური