,,კვირის პალიტრა“ ნოდარ დუმბაძის ,,თეთრი ბაირაღების“ ცნობილ გმირ ტიგრან გულოიანის შესახებ აქამდე უცნობ ისტორიაზე წერს, რომელიც თავად უამბო ერთ დროს ცნობილმა ე.წ. ,,კანონიერმა ქურდმა“. ,,კვირის პალიტრის“ ჟურნალისტმა სწორედ იმ ტიგრან გულოიანს მიაკვლია, რომელიც ნოდარ დუმბაძემ თავისი ნაწარმოების პერსონაჟად აქცია.

,,პირადად ჩემთვის თითქმის დაუჯერებელი ინფორმაცია - ”თეთრი ბაირაღების” ერთ-ერთი გმირი, ტიგრან გულოიანი ცოცხალია და რუსთავში ცხოვრობსო - კოლეგისგან მივიღე. ჩვენს ”პაპარაცისთან” ერთად მაშინვე მეტალურგთა ქალაქს მივაშურე და ნოდარ დუმბაძის წყალობით, მილიონობით ადამიანისთვის კარგად ცნობილი კანონიერი ქურდი მართლაც იქ ვიპოვე...“, - წერს გამოცემის ჟურნალისტი.

გულოიანი ნოდარ დუმბაძის გაცნობის ამბავს ჰყვება. მისივე მონათხრობით, ის არტუშ გრიგორიანია რეალურად, ხოლო ტიგრან გულოიანი მოგვიანებით დაირქვა.

,,სანამ ნოდარს გავიცნობდი, ჯერ ”პაბეგი ავიკიდე”, ანუ კოლონიიდან გავიქეცი. თეთრიწყაროს რაიონში ვიმალებოდი. იქ ერთი მეტყევე მოვკალი - როგორც დუმბაძე ამბობს, იმიტომ, რომ გლეხებს შეშას არ აძლევდა და სულ თავისთვის მიჰქონდა... სწორედ მაშინ შევიცვალე გვარ-სახელი. სინამდვილეში არტუშ გრიგორიანი ვარ, მერე კი ტიგრან გულოიანი გავხდი... მაინც დამაკავეს და კვლავ ციხეში მიკრეს თავი. ნოდარიც იქ ვნახე“.

გულოიანმა ,,ქრუდობას“ 20 წელია თავი დაანება და როგორც ის ამბობს, უკვე ,,მიქელგაბრიელს ელოდება“.

,,ქურდებს ვუთხარი, - ძმებო, ჩვენი ტრადიციებისთვის არასოდეს მიღალატია, მაგრამ დავუძლურდი, სნეულებები მაწუხებს და გამიშვით-მეთქი. შემომითვალეს, - წადი, ტიგრან, დაისვენე, ოღონდ მილიციასთან არ ითანამშრომლოო. ასეც მოვიქეცი. ვდგავარ ახლა აქ და მიქელგაბრიელს ველი... ზოგი მეუბნება, - ლეგენდარული კაცი ხარო... რა ვიცი, ასეთად არასოდეს მიმაჩნდა თავი...“, - ჰყვება გულოიანი ,,კვირის პალიტრის“ ჟურნალისტთან.