კომუნიკაციების ეროვნული კომისია ინტერნეტ-მომსახურების გაძვირებული ტარიფების შესახებ განცხადებას ავრცელებს, რომელსაც „ნიუპოსტი“ უცვლელად გთავაზობთ:

„საქართველოს კომუნიკაციების ეროვნული კომისიის „Facebook“-ის ოფიციალურ გვერდზე ბოლო პერიოდში მსხვილი ინტერნეტ პროვაიდერების მიერ მომსახურების საფასურის გაზრდასთან დაკავშირებით გამოთქმული პრეტენზიების გამო, 2014 წლის 24 თებერვალს კომისიასთან არსებულმა მომხმარებელთა ინტერესების საზოგადოებრივი დამცველის სამსახურმა წერილობით მიმართა შპს „კავკასუს ონლაინს“ და სს „სილქნეტს“. საზოგადოებრივი დამცველის წერილში აღნიშნულია, რომ მომხმარებლები ინტერნეტპროვაიდერების მიერ მომხმარებლისთვის შეთავაზებული გაუმჯობესებული მომსახურებისთვის, გაორმაგებული ინტერნეტ სიჩქარისთვის დაწესებული გაზრდილი გადასახადის გამო უკმაყოფილებას გამოთქვამენ.

ინტერნეტპროვაიდერ კომპანიებს ასევე მიეწოდათ ინფორმაცია, რომ მომხმარებელთა გარკვეული ნაწილის მტკიცებით, მიწოდებული ინტერნეტის ხარისხი და სიჩქარე ხშირ შემთხვევაში არ ემთხვევა სააბონენტო ხელშეკრულებით გათვალისწინებულ პირობებს.

ასევე, მოხდა კომპანიების ინფორმირება, რომ მომხმარებელთა გარკვეული კატეგორია ითხოვს, შეღავათიანი პირობები და მინიმალური ტარიფი დარჩეს იმ პირებს, რომლებიც წლების განმავლობაში ერთგულ მომხმარებლებად ითვლებიან.

აქედან გამომდინარე, მომხმარებელთა ინტერესების საზოგადოებრივი დამცველის სამსახურმა ინტერნეტპროვაიდერი კომპანიებისგან გამოითხოვა ინფორმაცია ტარიფების გაძვირების საფუძვლების შესახებ. ასევე, ინფორმაცია იმის თაობაზე, სამომავლოდ დაგეგმილია თუ არა მომხმარებელთათვის ოპტიმალური ტარიფის შეთავაზება.

ინტერნეტპროვაიდერებისგან მიღებულ ინფორმაციას ტარიფების ცვლილებასთან და სამომავლო გეგმებთან დაკავშირებით კომისიასთან არსებული მომხმარებელთა ინტერესების საზოგადოებრივი დამცველის სამსახური დამატებით გაცნობებთ“,- აღნიშნულია კომუნიკაციების ეროვნული კომისიის მიერ გავრცელებულ განცხადებაში.

ნინა შადური