სრულიად საქართველოს კათოლიკოს-პატრიარქი დღეს მცხეთაში არ მისულა. გავრცელებული ცნობით, უწმნიდესი წირვას ავადმყოფობის გამო ვერ ესწრება, თუმცა როგორც საპატრიარქოს პრესსამსახურში განმარტავენ, ეს მის ჯანმრთელობის მდგომარეობას არ უკავშირდება.

წირვას ესწრებოდნენ მინისტრთა კაბინეტის წევრები: თავდაცვის მინიტრი ირაკლი ალასანია, ფინანსთა მინისტრი ნოდარ ხადური და ჯანდაცვის მინიტრი დავით სერგეენკო. წირვას ასევე ესწრებოდნენ მომლოცველები, რომელებიც პატივს მიაგენებ სვეტიცხოველის ტაძარში დასვენებულ მამა გაბრიელის წმინდა ნაწილებს.

სვეტიცხოველი სავსეა მრევლით - დღეს დილით ტაძარი მოილოცეს და მამა გაბრიელის წმინდა ნაწილებს პატივი მიაგეს შეიარაღებული ძალების სამხედრო მოსამსახურეებმა.

მამა გაბრიელის წმინდა ნაწილებს სვეტიცხოვლის საპატრიარქო ტაძრიდან ხვალ, 12:00 საათზე გამოასვენებენ და თბილისისკენ მსვლელობით წააბრძანებენ. სასულიერო პირები და მრევლი სპორტის სასახლეს, გმირთა მოედანს და ვარაზისხევს, ვარდების რევოლუციის მოედანს, თავისუფლების მოედანს და ბარათაშვილის ხიდს გაივლიან.

მსვლელობა სამების საკათედრო ტაძარში დასრულდება, სადაც ბერ გაბრიელ სალოსის წმინდა ნაწილები ერთი კვირის განმავლობაში იქნება დაბრძანებული.