საქართველოს რეგიონული განვითარებისა და ინფრასტრუქტურის მინისტრი, გამყოფი ხაზის მიმდებარე სოფლებში დაზარალებული მოსახლეობის საჭიროებებზე რეაგირების დროებითი სამთავრობო კომისიის თანათავმჯდომარე, დავით ნარმანია, შიდა ქართლში სახელმწიფო რწმუნებულ-გუბერნატორ ზურაბ რუსიშვილთან ერთად, გამყოფი ხაზის მიმდებარე სოფლების მოსახლეობას შეხვდა. შეხვედრები აბისის, ბრეძას, ავლევისა და ხურვალეთის მცხოვრებლებთან შედგა.

მოქალაქეები აქტიურად ინტერესდებოდნენ პროგრამებით, რომელთა განხორციელებასაც ხელისუფლება საქართველოს სოფლებში აპირებს, აგრარული, სოციალური და ინფრასტრუქტურული თვალსაზრისით. სოფელ ბრეძაში მინისტრმა დაათვალიერა ახალი ამბულატორიისთვის დასამონტაჟებლად მომზადებული ტერიტორიაც, სადაც, მოკლე ხანში, სამედიცინო დაწესებულება, 81 ახალი ამბულატორიის პროგრამის ფარგლებში განთავსდება.

„დღეს ჩვენ ვეცნობით გამყოფი ხაზის მიმდებარე სოფლებში არსებულ მდგომარეობას, ვხვდებით მოსახლეობას იმისათვის, რომ უშუალოდ მათგან მოვისმინოთ საჭიროებები, მათ დაასახელონ ის, რაც დღემდე აწუხებთ და რაც მოსაგვარებელია, 2013 წელს ჩვენ რამდენიმე მნიშვნელოვანი ღონისძიება განვახორციელეთ ამ რეგიონში, გარკვეული გეგმები გვაქვს 2014 წლისთვისაც და, გვინდა, არსებული რესურსების პირობებში, პრიორიტეტები მაქსიმალურად სწორად შევარჩიოთ, მოსახლეობასთან ერთად დავგეგმოთ შესასრულებელი სამუშაოები.“- განაცხადა დავით ნარმანიამ,

„ამ შეხვედრების საფუძველი არის ჩვენი მთავრობის პოლიტიკა, რაც გულისხმობს ხალხთან ახლოს ყოფნას, მათი პრობლემების მოსმენასა და სწორი გადაწყვეტილებების მიღებას,“ განაცხადა ზურაბ რუსიშვილმა,

სოფელ ხურვალეთში, დავით ნარმანია და ზურაბ რუსიშვილი შეხვდნენ ეუთოს მისიის წარმომადგენლებს, რომლებიც გამყოფი ხაზის მიმდებარე სოფლებში ვითარების შესასწავლად იმყოფებოდნენ. მინისტრი მისიის წარმომადგენლებს იმ პრობლემების შესახებ ესაუბრა, რომელსაც ადგილობრივები მავთულხლართების გაბმის შემდეგ აწყდებიან.

შეხვედრები გამყოფი ხაზის მიმდებარე სოფლების მოსახლეობასთან მომავალშიც გაგრძელდება.