დედა პარასკევა - ტაძარში გადასვენებულ წმინდა ნაწილებთან მიახლოება ყველას შეეძლება

საზოგადოება - 11:42, 22 Feb, 2014

5390

მცხეთაში გაბრიელ ბერის საფლავი გაიხსნა და წმინდა ნაწილები გამოჩნდა, ამის შესახებ "ნიუპოსტს" დედა პარასკევამ განუცხადა. მისივე განმარტებით, ჟურნალისტებს აუცილებლად მიეცემათ წმინდა ნაწილების გადაღების საშუალება, როგორც კი წმინდანის ცხედარს სვეტიცხოველში გადაასვენებენ. "როცა წმინდა ნაწილებს ამოასვენებენ და ტაძარში გადაასვენებენ ნებისმიერ ადამიანს მიეცემა საშუალება ახლოს მივიდეს სიწმინდესთან", - განუცხადა "ნიუპოსტს" დედა პარასკევამ.
რაც შეეხება პატრიარქს, როგორც დედა პარასკევამ "ნიუპოსტთან" საუბრისას განაცხადა, ამ დროისთვის მის მობრძანებას ელოდებიან.
ამ წუთებში მცხეთაში იმყოფებიან მთავრობის წარმომადგენლებიც ოჯახებთან ერთად. მცხეთაში შესასვლელი გზები გადაკეტილია. ადგილზე მობილიზებულია შსს და თავდაცვის სამინისტროების წარმომადგენლები.
მამა გაბრიელის ცხედარს 13:00 საათზე სვეტიცხოვლის ტაძარში დაასვენებენ, სადაც პარაკლისს საქართველოს პატრიარქი გადაიხდის, ხოლო მომლოცველებს ტაძარში წმინდანისთვის პატივის მიგება 14:00 საათიდან შეეძლებათ. წმინდა მამა გაბრიელ სალოსის ნეშთი 24 თებერვალს ყოვლადწმინდა სამების საკათედრო ტაძარში გადასვენდება, სადაც ერთი კვირის განმავლობაში იქნება დაბრძანებული. შემდეგ წმინდა მამის ნეშტს სამთავროს ფერიცვალების მიძინების ტაძარში გადააბრძანებენ და საგანგებოდ გამზადებულ აკლდამაში დაასვენებენ.