სამთავროს ფერიცვალების დედათა მონასტერში მამა გაბრიელის საფლავის გათხრა დაიწყეს. გვიან საღამოდან მომლოცველებს მონასწტრის ტერიტორიაზე აღარ უშვებენ. იქ მხოლოდ სასულიერო პირები და საპატრიარქროს წარმომადგენლობა იმყოფება.

ადგილზე მობილიზებულია შს სამინისტროს საპატრულო პოლიციის ქვედანაყოფები და თავდაცვის სამინისტროს უწყება.

სამთავროს ფერიცვალების დედათა მონასტერში მედიის წარმომადგენლებს აღარ უშვებენ, ასევე სპეციალური ჯებირებით არის შემოსაზღვრული მონასტრის მიმდებარე ტერიტორია, რომლის იქით გადაადგილების უფლება მომლოცველებს აღარ აქვთ.

ღირსი მამის გაბრიელ სალოსის ნეშტის გამობრძანება მოხდება შაბათს, 22 თებერვალს 12:00 საათზე. პატრიარქი ჩაბრძანდება სამთავროს ფერიცვალების დედათა მონასტერში და პარაკლისს გადაიხდის. პარაკლისის დასრულების შემდეგ, დაახლოებით 13:00 საათზე მამა გაბრიელის წმინდა ნაწილები გადასვენდება სვეტიცხოვლის საკათედრო ტაძარში, ხოლო 14:00 საათიდან სვეტიცხოველში მომლოცველებს საშუალება ექნებათ პატივი მიაგონ წმინდანს.

სვეტიცხოველში საზეიმო ლოცვას კათოლიკოს-პატრიარქი დაიწყებს 19:00 საათზე. შესრულდება ღამისთევის წირვა 24:00 საათზე, 03:00 საათზე და ასევე კვირას, 23 თებერვალს 10:00 საათზე. წმინდა მამა გაბრიელ სალოსის ნეშთი ორშაბათს, 24 თებერვალს ყოვლადწმინდა სამების საკათედრო ტაძარში გადასვენდება, სადაც ერთი კვირის განმავლობაში იქნება დაბრძანებული. შემდეგ წმინდა მამის ნეშტს სამთავროს ფერიცვალების მიძინების ტაძარში გადააბრძანებენ და საგანგებოდ გამზადებულ აკლდამაში დაასვენებენ.