უკრაინაში გარდაცვლილი დავით ყიფიანის ცხედარს ექსპერტიზა უკვე ჩაუტარდა, - ამის შესახებ ცნობილი კონსტანტინე საბიაშვილისგან გახდა, რომელიც უკრაინაში საქართველოს კონსულია.

მისი ინფორმაციით, უკრაინული ექსპეტიზის დასკვნის თანახმად, დავით ყიფიანის გარდაცვალების მიზეზი სისხლის კორონალური მწვავე უკმარისობა და გულის იშემიური დაავადება გახდა.

როგორც საბიაშვილი ამბობს, გავრცელებული ინფორმაცია, რომ დავით ყიფიანი იარაღიდან გასროლის შედეგად გარდაიცვალა, ექსპერტიზის დასკვნაში მითითებული არ არის.

საბიაშვილი აცხადებს, რომ უკრაინული ექსპერტიზის დასკვნის მიხედვით, დავით ყიფიანს სხეულზე ცეცხლსასროლი ირაღიდან მიყენებული ჭრილობა არ აღენიშნება.

როგორც კონსული "კვირასთან" საუბარში აღნიშნავს, საჭირო დოკუმენტაციის მომზადების შემდეგ დავით ყიფიანის ცხედარს საქართველოში უახლოეს დღეებში გადმოასვენებენ.

შეგახსენებთ, რომ 34 წლის დავით ყიფიანი გუშინ გარდაიცვალა. ქართულ მედიაში გავრცელებული ინფორმაციით, ყიფიანს სნაიპერის ორი ტყვია ჰქონდა მოხვედრილი. ცხედარი კრეშატნიკის მოედანზე იპოვეს. დავით ყიფიანს მეუღლე და ერთი წლის შვილი დარჩა.