საავტომობილო გზების დეპარტამენტში სამტრედია-გრიგოლეთის გზის მშენებლობის პროექტის განხილვა გაიმართა.

აღნიშნული 52 კმ-იანი გზის ჩქაროსნულ მაგისტრალად მოდერნიზების პროექტი 4 ეტაპად (ლოტად) ხორციელდება. აქედან, პირველი ლოტის - 11,5 კმ-იანი მონაკვეთის მშენებლობა მიმდინარეობს (ამ ეტაპზე სრულდება ტოპო–გეოდეზიური სამუშაოები). ხოლო, დანარჩენი 3 ლოტის მშენებლობისათვის დეტალური პროექტირების სამუშაოები დაწყებულია. პროექტირებაზე ქართულ-პორტუგალიური ერთობლივი კომპანია ”JV” მუშაობს.

საავტომობილო გზების დეპარტამენტში აღნიშნული კომპანიის წარმომადგენლებსა და დეპარტამენტის ხელმძღვანელობას შორის მუშა შეხვედრა გაიმართა, სადაც პროექტის ტექნიკური დეტალები და საპროექტო სამუშაოების მიმდინარეობის დინამიკა განიხილეს.

სამტრედია-გრიგოლეთის მომდევნო მონაკვეთის პროექტირება 2014 წელს დასრულდება და სამშენებლო სამუშაოების შესყიდვაზე ტენდერიც მიმდინარე წელს გამოცხადდება.