ადვოკატი გიორგი ონიანი ხელისუფლებას მოუწოდებს სასწრაფოდ შეიქმნას სამუშაო ჯგუფი, რომლის შემადგენლობაშიც შევლენ ასევე ოპოზიციის წარმომადგენლები, ამ საკითხში გამოცდილი პროფესიონალები და რომელიც, მისი თქმით, უზრუნველყოფს ქვეყანაში კრიმინალიზაციის შეჩერებას.

ამის შესახებ ადვოკატი ,,ფესიბუქის“ გვერდზე წერს.

,,დღეს რაც თბილისში და ზოგადად ქვეყანაში ხდება, ის რომ კრიმინალი იზრდება და ამას ყავს კონკრეტული დაზარალებულები არის აბსოლუტურად ლოგიკური დღევანდელი ხელისუფლების პოპულისტური პოლიტიკის ფონზე. პირველ რიგში აღსანიშნავია ,,ბესელიას ამნისტია", რაც არის ნელი მოქმედების ნაღმი და როდის რომელ ოჯახს შეეხება არავინ იცის. ასევე აღსანიშნავია ე.წ.პოლიტპატიმრების მხრიდან პოლიციის ,,დაჩმორების" ფაქტები რასაც არ მოჰყვა ადექვატური რეაგირება და ბოლოს დამსახურებული პოლიციელების დისკრედიტაცია და გარკვეული კრიმინალების გმირებად გამოცხადება. სამწუხაროა რომ თბილისში უკვე გაჩნდა ე.წ. საძმოები, ბირჟები მისი ყველაზე ცუდი გაგებით და დიდი ოდენობით ნარკოტიკი. ეს საკითხი არ შეიძლება პოლიტიკური ანგარიშსწორების თემად ვაქციოთ და მოვუწოდებ ხელისუფლებას სასწრაფოდ შეიქმნას სამუშაო ჯგუფი, რომლის შემადგენლობაშიც შევლენ ასევე ოპოზიციის წარმომადგენლები, ამ საკითხში გამოცდილი პროფესიონალები და შეიქმნას სამოქმედო გეგმა, რაც საბოლოო ჯამში უზრუნველყოფს ქვეყნის კრიმინალიზაციის შეჩერებას და ბევრ ოჯახს აარიდებს მოსალოდნელ უბედურებას“, - წერს გიორგი ონიანი.