უკანონოდ მოპოვებული ფარული ჩანაწერების საკითხებზე მომუშავე დროებითი საგამოძიებო კომისიის წევრის ლაშა ტუღუშის განცხადებით, სატელეფონო კომპანიებში პირადი ინფორმაციის დაცულობა უზრუნველყოფილი არ არის და მასზე წვდომა მარტივად შესაძლებელია.

“მინდა, მოვიყვანო შავი ყუთების მაგალითი. რა არის ეს შავი ყუთი: ეს არის სატელეფონო კომპანიებში აწყობილი სისტემა. ყველა სატელეფონო კომპანიაში არის სპეციალური ადგილი, სადაც შს ორგანოების ტექნიკა უერთდება ამ სატელეფონო კომპანიების საინფორმაციო ბაზას და ნებისმიერი ინფორმაციის გადაქაჩვა არის შესაძლებელი. ამ სისტემას სჭირდება თუ არა კონტროლი? მაგალითად, თქვენ ჟურნალისტებს, რომლებიც აგზავნით პირად მესიჯებს, შეტყობინებებს, ამის დაცულობა გაქვთ, რომ მას არავინ კითხულობს? რატომ არ იშლება თქვენი პირადი მესიჯები? თქვენ ხართ რისკიანი პროფესიის წარმომადგენლები, თქვენი პირადი ინფორმაცია ხელმისაწვდომია ყოველგვარი დაბრკოლების გარეშე. გერმანიაში ან სხვა დემოკრატიულ ქვეყნებში მომენტალურად იშლება ის ინფორმაცია, რომელსაც თქვენ მესიჯებით აგზავნით. საქართველოში ის არ იშლება – ყველას შეუძლია ისარგებლოს, სატელეფონო კომპანიას შეუძლია, ის წაიკითხოს, შეინახოს და თავისი მიზნებისთვის გამოიყენოს”, - განაცხადა ლაშა ტუღუშმა სააგენტო "პირველის" პრესკლუბში.