დღეს აჭარის მთავრობის თავმჯდომარე არჩილ ხაბაძე და საქართველოს ენერგეტიკის მინისტრის მოადგილე ილია ელოშვილი ენერგო-პროს ბათუმის ფილიალში ახალი პროექტის პრეზენტაციას დაესწრნენ.

მალე აჭარაში მაღალი ძაბვის ქვესადგურის მშენებლობა დაიწყება, რითაც სისტემის დივერსიფიკაცია მოხდება და საქართველოს ენერგო რესურსების საექსპორტო პოტეციალის გაზრდა. კომპანია „ენერგო–პრო ჯორჯია“ ხელვაჩაურში 220/154 კვ ძაბვის, 350 მეგავატი სიმძლავრის ქვესადგურს ააშენებს. ქვესადგურიდან გამომავალი ელექტროენერგიის გადამცემი ხაზი სოფელ კირნათს საქართველო–თურქეთის საზღვართან გადაკვეთს და თურქეთის მხარეს გადავა, სადაც მურათლი ჰესის გამანაწილებელ მოწყობილობას დაუკავშირდება. შესაბამისად, ს.ს. ენერგო–პრო ჯორჯია 154 კვ მაღალი ძაბვის ელექტროენერგიის გადამცემ ხაზ „ბათუმი–მურათლის“ ააშენებს.

„აჭარის მთავრობა ამ პროექტის განხორციელებაში თავიდან ბოლომდე იქნება ჩართული. თავდაპირველად ამ ტერიტორიაზე მცხოვრები ადგილობრივების განსახლების საკითხი იქნება შესწავლილი და გათვალისწინებული. უკვე შექმნილია სამთავრობო ჯგუფი და დაწყებულია ადგილობრივი ოჯახების შესწავლა. გამოიყოფა კატეგორიები და მათი განსახლების პირობები. პროექტის ღირებულება 60 მილიონი ლარია და ეს სტრატეგიული ობიექტია რეგიონისთვის და ქვეყნისთვის. „- განაცხადა არჩილ ხაბაძემ.

ილია ელოშვილის თქმით, “ესაა კერძო კომპანია, რომელიც ქვესადგურს აშენებს აჭარაში. მისი მთავარი დანიშნულება იქნება წარმოებული ელექტროენერგიის თურქეთში ექსპორტი. მშენებლობა უახლოეს კვირეებში დაიწყება და ორ წელიწადში დასრულდება. აღნიშნული ხაზი ხელს შეუწყობს საქართველოდან თურქეთის მიმართულებით ელექტროენერგიის ექსპორტის და იმპორტის განვითარებას, რაც თავის მხრივ გაზრდის ენერგოუსაფრთხოების გარანტიებს ქვეყანაში."

ბათუმი–მურათლის ხაზის მშენებლობის პროექტის განხორციელება ხელს შეუწყობს ქართული და თურქული ენერგოსისტემების პარალელურ რეჟიმში მუშაობას.