„აირზენა“ ზამთრის ოლიმპიადის დასრულების შემდეგ, სოჭის მიმართულებით რეგულარულ ფრენებს კვლავ გააგრძელებს.

ამის შესახებ „ნიუპოსტს“ „აირზენას“ გენერალურმა დირექტორმა თამაზ გაიაშვილმა განუცხადა.

„ოლიმპიადიდან გამომდინარე მოვითხოვეთ ფრენებზე ნებართვა სოჭის მიმართულებით, თებერვლის თვეზე ჩვენ მივიღეთ ნებართვა. ჩვენ გვქონდა დაგეგმილი, რომ შემდგომშიც გაგვეგრძელებინა ეს ფრენები. მინდა მადლობა ვუთხრა პრეზიდენტ პუტინს, რადგან მან აღნიშნა, რომ ჩვენ ეს საკითხი განვიხილეთ და დავაკმაყოფილეთო. „აირზენა“ სოჭის მიმართულებით ფრენებს გაგრძელებს,“- აცხადებს გაიაშვილი.

რუსეთის პრეზიდენტმა ოლიმპიადის პრესცენტრში გააკეთა განცხადება, რომ თბილისიდან სოჭის მიმართულებით რეგულარული ფრენების პრაქტიკა ოლიმპიადის შემდეგაც შენარჩუნდება.