„ნაციონალური მოძრაობის“ წევრის გივი თარგამაძის სახლთან საპროტესტო აქცია გაიმართა.

აქცია სახელწოდებით “მოუხადე ხალხს ბოდიში შეურაცხყოფისთვის“ არასამთავრობო ორგანიზაცია „ახალგაზრდული ცენტრის“ წარმომადგენლებმა გამართეს.

ისინი ეხმაურებიან გივი თარგამაძის მიერ გაკეთებულ განცხადებას, რომლის თანახმად, “ახალგაზრდული ცენტრის“ წარმომადგენლები მართავენ აქციებს იმისთვის, რომ თარგამაძის ბრიფინგები გადაფარონ.

“ჩვენ დავიწყეთ კამპანია, დაუბრუნდეს მოსახლეობას წართმეული ქონებები, რის შემდეგაც გივი თარგამაძემ გააკეთა განცხადება, ვითომ ჩვენ ვიღაცამ ჩამოგვიყვანა დედოფლისწყაროს რაიონიდან იმისთვის, რომ გადაგვეფარა მათი ბრიფინგები. გივი თარგამაძე არის მატყუარა ადამიანი და ამ აქციასაც ჰქვია, რომ მან უნდა აგოს პასუხი იმ ტყუილებისთვის, რა ტყუილებსაც აჟღერებდა და საზოგადოებას გასცეს პასუხი კითხვებზე, საიდან აქვს მის ნათესაობას ამდენი ქონება. ასევე, მივმართავ შესაბამის ორგანოებსაც, რომ იქნას ეს საკითხი გამოძიებული. ჩვენ გვაქვს ინფორმაცია, რომ 9 წლის განმავლობაში სასათბურე პირობებში ამყოფებდნენ იმ კომპანიებს, რომლებიც მათ ეკუთვნით. გივი თარგამაძე არის ჩვეულებრივი მატყუარა ადამიანი და მას არ აქვს უფლება, საზოგადოების სახელით აკეთოს განცხადებები და მაოწყოს ბრიფინგები“, - განაცხადა ზურაბ ქადაგიძემ.