სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ საკვირაო ქადაგებაში თავმდაბლობის მნიშვნელობაზე იქადაგა.

უწმინდესმა ხაზი გაუსვა, რომ ერთადერთი გზა სასუფევლისკენ - ეს არის განცდა საკუთარი ცოდვებისა.

"ხშირია, როდესაც ადამიანი სჩადის ცოდვას და ვერ გრძნობს, რომ ეს ცოდვაა. ლოცვაში წერია - უფალო მოგვანიჭე განცდაი თვისა ცოდვათა და არა განკითხვა ძმისა ჩვენისა, ეს არის ერთადერთი გზა სასუფევლისკენ. ღმერთმა მოგვანიჭოს განცდაი თვისა ცოდვათა. მადლით აავსოს თქვენი გული, სული და ხორცი, ბედნიერი აღდგომა გაგვითენოს უფალმა", - ბრძანა უწმინდესმა.

პატრიარქმა ქადაგებისას აღნიშნა, რომ ადამიანმა მადლობა უნდა შესწიროს უფალს ყოველი დღისთვის და ყველაფრისთვის, რაც მას უფლისგან აქვს - იქნება ეს მწუხარება თუ განსაცდელი.

"ჩვენ უნდა ვმადლობდეთ უფალს ყველაფრისთვის, იმ სიხარულის, მწუხარების თუ განსაცდელისთვის, რასაც გვიგზავნის. უნდა გვახსოვდეს, რომ უფალი განსაცდელს გვაძლევს, რათა სულიერად გავძლიერდეთ", - ბრძანა უწმინდესმა.

ქადაგების დასასრულს, პატრიარქმა აღნიშნა, რომ მომავალ შაბათს მირქმის დღესასწაულთან დაკავშირებით, წირვას სამების საკათედრო ტაძარში 10:00 საათზე ჩაატარებს, პარასკევს საღამოს კი ასევე სამებაში ლოცვა 17:00 საათზე დაიწყება.