ეკონომიკის ექსპერტი ლევან კალანდაძე მიიჩნევს, რომ ლარის კურსის დაცემამ, საქართველოში ცხოვრების გაძვირება მოჰყვა.

"სასურსათო კალათა საქართველოში ლარის კურსის ცვლილების შემდეგ საგრძნობლად დამძიმდა, ეს კი ნიშნავს იმას რომ ჩვენ გვიძვირდება ცხოვრება", - აღნიშნა ლევან კალანდაძემ "ნიუპოსტთან" საუბარში.

ექსპერტის თქმით, ქვეყნის ეკონომიკა დამოკიდებულია ძირითადად იმპორტზე. იმპორტირებული პროდუქტის გაძვირება კი იმას ნიშნავს, რომ ფასების ზრდა ვრცელდება სასაქონლო ჯგუფების აბსოლუტურ უმრავლესობაზე.

„.ჩვენ იმპორტის მომხმარებელი ქვეყანა ვართ, საუბარია არა მხოლოდ იმ პროდუქტზე, რომელიც შემოდის უცხოეთოდან, არამედ იმაზეც რაც საქართველოში იმპორტირებული ნედლეულით, იწარმოება. მათი ფასები მნიშვბელოვნად იზრდება და შესაბამისად ზარალდება მოსახლეობა“- მიაჩნია ლევან კალანდაძეს.

ექსპერტმა ისიც აღნიშნა, რომ როცა ქვეყანაში ლარის კურსი ეცემა, ამით ადგილობრივ წარმოებას საშუალება ეძლევა უკეთ განვითარდეს, მაგრამ იმის გათვალისწინებით რომ საქართველოში ეს კომპონენტი ძალიან მცირეა, დადებითი ეფექტი ეკონომიკაზე ზოგადად არ არის.

„რატომ დაეცა ლარის კურსი? პირველი ფაქტორი არის ის რომ საბიუჯეტო პოლიტიკა, რომელიც 2013 წელს განხორციელდა იყო არასწორად დაგეგმილი და განხორციელებული. განსაკუთრებით ხარჯვით ნაწილში გვქონდა პრობლემები. ფინანსთა სამინისტროი მთელი 9 თვის განმავლობაში ფულს ეკონომიურ რეჟიმში ხარჯავდა, ხოლო 2013 წლის ბოლო კვარტალში ფულის ძალიან დიდი მასა გამოუშვა. დაიწყო სოციალური პროექტების დაფინანსება, ეს კი ნიშნავს, რომ მიმოქცევაში გამოვიდა ჭარბი ფული და ამან ლარის მსყიდველობითი უნარი დააგდო", - განუცხადა "ნიუპოსტს" ლევან კალანდაძემ.