საქართველოს ენერგეტიკის სამინისტრო პროექტის „მერების შეთანხმება“ ეროვნული კოორდინატორი გახდა. შესაბამისი ურთიერთთანამშრომლობის ხელშეკრულება ენერგეტიკის სამინისტროსა და ევროკომისიას შორის გაფორმდა.

ხელშეკრულების ფარგლებში, ენერგეტიკის სამინისტრო ევროკომისიას პროექტის ხელმომწერი მუნიციპალიტეტებისთვის გრძელვადიანი სამოქმედო სტრატეგიის მომზადების პროცესში საინფორმაციო და საკონსულტაციო მომსახურებას გაუწევს.

„მერების შეთანხმება“, რომელსაც საქართველო 2010 წელს შეუერთდა, არის ევროკომისიის ფართომასშტაბიანი ინიციატივა. იგი აერთიანებს ადგილობრივ და რეგიონულ მთავრობებს, რომლებიც ნებაყოფლობით იღებენ ვალდებულებას გაზარდონ ენერგოეფექტურობა და განახლებადი ენერგიის წყაროების გამოყენება მათ დაქვემდებარებაში მყოფ ტერიტორიებზე. შეთანხმების ხელმომწერნი მიზნად ისახავენ 2020 წლისათვის შეამცირონ CO2-ის ემისიები მინიმუმ 20%-ით და ამით თავიანთი წვლილი შეიტანონ მწვანე ეკოლოგიურად ორიენტირებული ეკონომიკის განვითარებასა და საცხოვრებელი პირობების გაუმჯობესებისათვის.

დღეისათვის პროექტის მონაწილე მსოფლიოს 5 460 მუნიციპალიტეტია, მათ შორის საქართველოს 7 ქალაქი - თბილისი, ქუთაისი, რუსთავი, გორი, ფოთი, ზუგდიდი და ბათუმი.