განკარგულების პროექტი "საქართველოში ავტოსატრანსპორტო საშუალებების გზისთვის ვარგისობაზე სავალდებულო პერიოდულ ტესტირებაზე გადასვლასთან დაკავშირებით განსახორციელებელი ღონისძიებების შესახებ" მთავრობამ უკვე მოიწონა.

სავალდებულო ავტოტექდათვალიერებას სულ 900 ათასი ავტომობილი გაივლის, რომელთაც სულ 22 სერვის ცენტრი მოემსახურებათ. ტექდათვალიერების ღირებულება ჯერ დადგენილი არ არის.

ეკონომიკის მინისტრის მოადგილის ნათია მიქელაძის განცხადებით, "სახელმწიფო ფასის დადგენას ყურადღებას მიაქცევს და იგი იქნება საქართველოს რეალობაზე მორგებული".

ავტოტექდათვალირების უზრუნველყოფისთვის უკვე მიმდინარეობს მოლაპარაკებები TUV Rheiland Group-თან, რომელსაც საქართველოს ეკონომიკისა და შინაგან საქმეთა სამინისტროები აწარმოებენ. ამ მიმართულებით სამი საერთაშორისო ოპერატორი არსებობს და ერთ-ერთი სწორედ TUV Rheiland Group-ია.

ნათია მიქელაძის თქმით, TUV Rheiland Group-ის შემოსვლა საქართველოში მნიშვნელოვანია, რადგან „მოჰყვება არა მარტო გარანტირებული უსაფრთხოება, არამედ ინვესტიციებიც“.

ავტომობილებზე სავალდებულო ტექდათვალიერება 2004 წელს გაუქმდა.