კახა კალაძე - ჩვენ მივიყვანთ ქართულ ენერგეტიკას დამოუკიდებლობამდე

ბიზნესი & ეკონომიკა - 12:55, 24 Jan, 2014

2531

ენერგეტიკის მინისტრის კახა კალაძის განცხადებით, ხელისუფლება შეძლებს ქართული ენერგეტიკა დამოუკიდებლობამდე მიიყვანოს. ამის შესახებ მინისტრმა ყაზბეგის რაიონში "ლარსი ჰესის" პრეზენტაციაზე განაცხადა.
„ლარსი ჰესის“ მშენებლობით უმწვავესი პრობლემის - მთის მოსახლეობის მიგრაციის შეჩერება და ცხოვრებისთვის შესაფერისი სოციალური პირობების შექმნაა შესაძლებელი. ჩემთვის ამ ობიექტის გახსნა ორმაგად მნიშვნელოვანია - უპირველეს ყოვლისა ის, რომ ახალი სიმძლავრე ემატება ჩვენი ქვეყნის ენერგოსისტემას და გასული წლის განმვალობაში ეს არის მესამე ამოქმედებული ენერგოობიექტი. ასეთი ობიექტები ადგილობრივი მოსახლეობის დასაქმების გარანტიაა, როგორც ვიცი მოწესრიგდა მიმდებარე ინფრასტრუქტურაც, რაც კიდევ დამატებით სამუშაო ადგილებს ქმნის. ამ ულამაზეს ხეობაში, სადაც გადის ტურისტული თუ კომერციული მარშუტები, იქნება სასტუმროები, კვების ობიექტები, იქნება მუდმივი ელექტომომარაგება, ხალხი იქნება დასაქმებული, მოსახლეობა იქნება მოვლენების ეპიცენტრში, ახალგაზრდობისთვის აქ დარჩენა იქნება უკვე საინტერესო და მიმზიდველი, რეგიონი ფეხზე დადგება. ჩვენ უნდა გავაცნობიეროთ ერთი რამ _ თითოეული მოქალაქე ვალდებულია სრულყოფილად შეასრულოს ის სამუშაო, რაც მას ევალება, დაწყებული ამ ჰესზე მომუშავე პერსონალით, დასრულებული ქვეყნის მთავრობით”, - განაცხადა კალაძემ. მისივე თქმით, ქართული ენერგეტიკა ქვეყნის ეკონომიკას მაქსიმალურ განვითარებამდე და კეთილდღეობამდე მიიყვანს. “ჩვენ უნდა გავაცნობიეროთ, რომ ყველა დარგი, ყველა პროექტი მიბმულია ერთმანეთზე და მხოლოდ ერთობლივი მუშაობა და საერთო ძალისხმევა მოგვცემს ისეთ ეკონომიკურ ეფექტსა და წინსვლას, რაც ჩვენი ქვეყნის სწრაფ განვითარებას შეუწყობს ხელს. ჩვენ მივიყვანთ ქართულ ენერგეტიკას დამოუკიდებლობამდე”, - აღნიშნა კალაძემ.