ევროპის რეკონსტრუქციის ბანკი ეკონომიკური პრობლემების დაძლევის მთავარ იარაღად უცხოურ ინვესტიციებს ასახელებს. ბანკის რეგიონული დირექტორის განმარტებით, ინვესტორების ყურადღების მისაქცევად მთავრობამ მკაფიოდ უნდა ჩამოაყალიბოს თავისი ეკონომიკური პოლიტიკა:

„საჭიროა ინვესტორთან ნდობის ამაღლება, შესაბამისად ქვეყანაში კაპიტალის შემოსვლის ხელშეწყობა, ამ ნდობის მოსაპოვებლად კი საჭიროა შესაბამისი გარემოს შექმნა და მეორე, ნათელი განმარტება იმასთან დაკავშირებით, თუ როგორია მთავრობის ეკონომიკური კურსი.

ჩვენ მივესალმებით იმ ფაქტს, რომ მთავრობა ამუშავებს გრძელვადიან ეკონომიკურ სტრატეგიას 2020 წლამდე. თუმცა, რაც შეიძლება სწრაფად უნდა დაიდოს ამ სტრატეგიის მიხედვით გაწერილი კონკრეტული სამოქმედო გეგმა.

ასეთი დეტალური გეგმის გარეშე კი ეს სტრატეგია მხოლოდ სურვილების დონეზე დარჩება. ეკონომიკის გამოცოცხლების ნიშნებს ჩვენც ვხედავთ აქაურ პარტნიორებთან ურთიერთობისას და მათთან ერთად რამდენიმე ახალ პროექტსაც დავიწყებთ.

მაგრამ ეკონომიკის ზრდის პროგნოზს მაინც 4-დან 5 პროცენტამდე ნიშნულზე ვტოვებთ და ჯერჯერობით მის გადახედვას არ ვაპირებთ“, - განაცხადა ოლივიე დეკამპიმ „ბიზნესკურიერთან“ საუბრისას.