ოპერისა და ბალეტის თეატრის სამხატვრო ხელმძღვანელი გიორგი ჟორდანია გადადგა. ამის შესახებ მან დღეს ჟურნალისტებს თავად განუცხადა.

ჟორდანიას გადადგომას დადებითად აფასებს კულტურის მინისტრი გურამ ოდიშარია. ,,დღესაც შევხვდით ჟორდანიას, ვისაუბრეთ. მან მიიღო გადაწყვეტილება, რომელსაც დადებითად ვაფასებ,“- განაცხადა ოდიშარიამ.

გადადგომის შესახებ განცხადება გააკეთა გიორგი ჟორდანიამაც. ,,გულდასაწყვეტია რომ ეს გადაწყვეტილება მივიღე. ეს ჩემი სახლია და ძალიან გული შემტკივა. არანაირი სკამი არაფრად არ ღირს, მივიღე გადაწყვეტილება დავტოვო თანამდებობა, მე დღეიდან ოპერის სამხატვრო ხელმძღვანელი აღარ ვარ.“- განაცხადა ჟორდანიამ.

ჟორდანიას გადადგომას ოპერისა და ბალეტის დასის წევრები სამი დღეა ითხოვენ. დღეს კულტურის მინისტრი ოპერის სოლისტებს შეხვდა. ოდიშარიას განცხადებით, არის დარღვევები და თეატრში აუდიტის სამსახური უნდა შევიდეს.