მინისტრმა და კომპანიის წარმომადგენლებმა ახლადაშენებული გაზსადენი გახსნეს და სოფლის ცენტრში ჩირაღდანი აანთეს.

კომპანიამ „სოკარ ჯორჯია გაზი“ სოფელ ახაშენის მიმართულებით, 20 კმ სიგრძის საშუალო წნევის გაზსადენი ააშენა, რის შედეგადაც სოფელში მცხოვრებ 400 პოტენციურ აბონენტს გაზის საერთო ქსელში ჩართვის შესაძლებლობა აქვს. კომპანია სოფელ ახაშენში გაზიფიცირების მესამე ეტაპის განხორციელებას 2014 წელს გეგმავს. დაგეგმილი სამუშაოების შედეგად სოფლის სრული გაზიფიკაცია მოხდება და ბუნებრივი აირის მიღებას დამატებით 500 აბონენტი შეძლებს.

დღეისათვის გურჯაანის მუნიციპალიტეტში სრულად გაზიფიცირებულია ქალაქი გურჯაანი და 9 სოფელი. აშენდა 144 კმ სიგრძის გაზსადენი, რაც რაიონში მცხოვრები 7 ათასი ოჯახის ბუნებრივი აირით მომარაგებას უზრუნველყოფს. კახეთის რეგიონში უკვე აშენებულია 913 კმ სიგრძის საშუალო წნევის გაზსადენები და გაზიფიცირებულია 39 500 აბონენტი.

მთელი ქვეყნის მასშტაბით, გაზიფიცირების სამუშაოები აქტიურად მიმდინარეობს. შემუშავებულია 2014 წლის გეგმა, რომლის თანახმადაც მომავალი წლის ბოლომდე 86 ათასზე მეტი ოჯახი გაზიფიცირდება. ამასთან, კომპანია „სოკარი“ გაზრდილი საინვესტიციო ვალდებულებების ფარგლებში, 2017 წლამდე დამატებით 100 ათასი ოჯახის გაზიფიცირებას განახორციელებს. ენერგეტიკის სამინისტროსთან შეთანხმებული გეგმის შესაბამისად, ამ პერიოდისთვის მთელი ქვეყნის მოსახლეობის 75%-ს შესაძლებლობა ექნება ბუნებრივი აირით ისარგებლოს.

გარდა ამისა, გაზგამანაწილებელი კომპანიები მოსახლეობას ოჯახში ბუნებრივი აირის შესაყვანად საჭირო თანხის რამდენიმე თვეზე გადანაწილებას სთავაზობენ. ენერგეტიკის სამინისტროსთან შეთანხმებით, აღნიშნული თანხა თვიურად 25 ლარს არ უნდა აღემატებოდეს.