2013 წელს ანსამბლი ”ქართული ხმების” ახალ თაობას სასცენო მოღვაწეობის 15 წელი შეუსრულდა. ანსამბლმა საიუბილეო თარიღთან დაკავშირებით ახალი ალბომი გამოსცა, რომელზეც მუშაობა ”ბრავო რექორდსში” ორი წლის განმავლობაში მიმდინარეობდა.

რადგანაც ალბომი საიუბილეო თარიღს ეძღვნება მასში შედის ყველა იმ ჟანრის ნაწარმოები, რომელშიაც უმუშავიათ ჯგუფის წევრებს მთელი ამ ხნის განმავლობაში. მუსიკალური ნაწარმოებები ორ დისკზეა გადანაწილებული. პირველ დისკზე თავმოყრილია ქართული ხალხური სიმღერების, ხოლო მეორეზე სრულიად ახალი სასიმღერო კომპოზიციების და ასევე საყოველთაოდ ცნობილი და პოპულარული ჰიტების აბსოლუტურად ექსპერიმენტული, განსხვავებული ვოკლაური და ინსტრუმენტული არანჟირებით შექმნილი ვერსიები. ალბომის ჩაწერებზე მონაწილეობა მიიღეს ისეთმა მუსიკოს-შემსრულებლებმა როგორებიც არიან: ნიაზ დიასამიძე, რომა რცხილაძე, ნანი ბრეგვაძე, სალომე ბაკურაძე, ზვიად ბოლქვაძე, მიშა მდინარაძე, დავით მალაზონია და ა.შ. ამ ალბომის სახით „ქართული ხმები”-ს თაყვანისმცემლებს ნამდვილი მუსიკალური სიურპრიზი ელით.

პრეზენტაციაზე მოწვეულ სტუმრებს შესაძლებლობა ექნებათ მოისმინონ ორი მუსიკალური ნომერი ახალი ალბომიდან. ასევე პრეზენტაციის ბოლოს გაიმართება ალბომზე ხელის მოწერის ცერემონიალი, სადაც ანსამბლის წევრები მოწვეულ სტუმრებს, საჩუქრად გადაცემულ ახალ ალბომებზე დაურიგებენ ავტოგრაფებს და გადაიღებენ სამახსოვროდ ფოტოებს.

ახლო მომავალში იგეგმება ”ქართული ხმების” გრანდიოზული კონცერტი თბილისის დიდ საკონცერტო დარბაზში. ამჟამად ”ბრავო რექორდსის” სტუდიაში მიმდინარეობს კონცერტის წინამოსამზადებელი სამუშაოები. კონცერტზე შესრულდება ოცამდე მუსიკალური ნომერი ახალი ალბომიდან სიმფონიური ორკესტრისა და ”ბრავო ბენდის” თანხლებით. კონცერტის რეჟისორი დავით საყვარელიძე იქნება.