ყოველწლიურად თამბაქოს მოხმარების შედეგად 8 მილიონი ადამიანი იღუპება. თამბაქოს ზიანის შემცირების სტრატეგია კი წარმოადგენს შესაძლებლობას, გადავარჩინოთ მილიონობით ადამიანის სიცოცხლე.

დებატები იმის შესახებ, შესაძლებელია თუ არა თამბაქოს ზიანის შემცირება, უკვე ათწლეულებია მიმდინარეობს. ბოლო ათწლეულის განმავლობაში ბაზარზე ახალი ტექნოლოგიების გამოჩენის შედეგად “თამბაქოს ზიანის შემცირების” სტრატეგიის შესაძლო სარგებლის შესახებ დისკუსია კი აქტიურ ფაზაში გადავიდა.

ზიანის შემცირების შესახებ

თავდაპირველად, “ზიანის შემცირების” ცნება ნარკოტიკებთან მიმართებით შეიქმნა და მიზნად ისახავდა მავნე და დამოკიდებულების გამომწვევი ჩვევების შედეგად ორგანიზმისთვის მიყენებული ზიანის შემცირებას. “ზიანის შემცირების სტრატეგიის” თანახმად, საუკეთესო გამოსავალს ამ მავნე ჩვევებისგან სრულად გათავისუფლება და მავნე პროდუქტების მოხმარებისთვის თავის დანებება წარმოადგენს, თუმცა ეს ყოველთვის შესაძლებელი არ არის. სწორედ ამიტომ, აღნიშნული სტრატეგია იმ ალტერნატიული პროდუქტების შესაძლო სარგებელს ითვალისწინებს, რომლებიც ორგანიზმისთვის მიყენებული ზიანის შემცირებას უწყობენ ხელს.

რას გულისხმობს თამბაქოს ზიანის შემცირების სტრატეგია?

თამბაქოს ზიანის შემცირების ცნება თავდაპირველად 1976 წელს გაჩნდა, როდესაც პროფესორმა მაიკლ რუსელმა თქვა, რომ “ადამიანები ნიკოტინის მიღების მიზნით ეწევიან, თუმცა ისინი კუპრის შედეგად კვდებიან” და განაცხადა, რომ ნიკოტინისა და კუპრის თანაფარდობა “უსაფრთხო მოწევის” შესაძლებლობას წარმოადგენდა.

ამ პერიოდიდან მოყოლებული გაჩნდა მეცნიერულად დადასტურებული საფუძველი იმისა, რომ თამბაქოს მოხმარების შედეგად ორგანიზმისთვის მიყენებულ ზიანს არა ნიკოტინი, არამედ თამბაქოს წვის შედეგად გამოყოფილი ტოქსიკური ნივთიერებები წარმოადგენდა. ტრადიციული სიგარეტებისგან განსხვავებით, თამბაქოს უკვამლო მოწყობილობები წარმოქმნიან ნიკოტინს და ამცირებენ კვამლში არსებული ტოქსიკური ნივთიერებების რაოდენობას.

თამბაქოს ზიანის შემცირების სტრატეგიის მთავარ ინსტრუმენტს კი თამბაქოს ელექტრონული სიგარეტები და გასახურებელი მოწყობილობები წარმოადგენს, რომელიც იმ ზრდასრულ მწეველებს, რომლებიც ვერ ან არ ანებებენ თავს მოწევას, აძლევს შესაძლებლობას, მიიღონ ნიკოტინის სასურველი რაოდენობა და შეამცირონ ტრადიციული სიგარეტის მოხმარების შედეგად ორგანიზმისთვის მიყენებული ზიანი.

დღეს ჯანდაცვის ექსპერტთა ნაწილი თამბაქოს ზიანის შემცირების სტრატეგიას “თამბაქოს ეპიდემიასთან” ბრძოლის პროცესში დიდ მნიშვნელობას ანიჭებს.

“ყოველწლიურად თამბაქოს მოხმარების შედეგად 8 მილიონი ადამიანი იღუპება. თამბაქოს ზიანის შემცირების სტრატეგია კი წარმოადგენს შესაძლებლობას, გადავარჩინოთ მილიონობით ადამიანის სიცოცხლე”, - ამბობს დავიდ სვეარონი, ჯანდაცვის ექსპერტი.

თამბაქოს უკვამლო მოწყობილობების შესაძლო სარგებელს კი აღიარებენ მსოფლიოს ჯანდაცვის ისეთი გავლენიანი ორგანიზაციები, როგორებიც არის: Public Health England და აშშ-ს საკვებისა და მედიკამენტების ადმინისტრაცია.