ერთიანი ნაციონალური მოძრაობის თავმჯდომარე, ოპოზიციის მერობის კანდიდატი ნიკა მელია ქვეყანაში შექმნილ ეპიდვითარებას ეხმაურება და აღნიშნავს, რომ თუ პროფესიონალებს მიაჩნიათ, რომ ამ სასაკლაოს შეჩერება შესაძლებელია მხოლოდ „ლოქდაუნის“ დაწესებით ან არჩევნების გადადებით, იმნაძემ, გამყრელიძემ და ცერცვაძემ ამაზე უნდა ისაუბრონ.

"დღის განმავლობაში ვკარგავთ 60-მდე ადამიანს. თუ პროფესიონალებს მიაჩნიათ, რომ ამ სასაკლაოს შეჩერება შესაძლებელია მხოლოდ „ლოქდაუნის“ დაწესებით ან არჩევნების გადადებით, იმნაძემ, გამყრელიძემ და ცერცვაძემ ამაზე უნდა ისაუბრონ.

ამ ეტაპზე ეროვნული მნიშვნელობის ამოცანაა საკოორდინაციო საბჭოში შემავალმა ეპიდემიოლოგებმა, ექიმებმა გვითხრან, საზოგადოება საქმის კურსში ჩააყენონ, თუ როგორია მათი ხედვა, როგორია მათი პროგნოზი საარჩევნო პერიოდის გათვალისწინებით" - აღნიშნა მელიამ.

მისივე თქმით, ხელისუფლება ვითარებას კორონავირუსთან მიმართებაში პოლიტიკური მანიპულაციებისთვის იყენებდა.

"ხელისუფლება სამწუხაროდ იყენებდა ვითარებას კორონავირუსთან მიმართებაში პოლიტიკური მანიპულაციებისთვის, პოლიტიკური მიზანშეწონილობიდან გამომდინარე იღებდა გადაწყვეტილებას და არარეალურ ნაბიჯებს დგამდა.

ამ წუთის მდგომარეობით არის სრული ვაკუუმი და პრაქტიკულად სიბნელეში დგამენ ნაბიჯს და ამ სიბნელეში ხელების ფათურით დღის განმავლობაში ვკარგავთ 60-მდე ადამიანს.

ჯანდაცვის სისტემა, ჩვენი ინფორმაციით, ვეღარ უძლებს წნეხს და არის სერიოზული აზრთა სხვადასხვაობა ხელისუფლებას და ეპიდემიოლოგებს შორის"- აღნიშნა მელიამ.