დამოუკიდებელი დეპუტატის თამარ კორძაიას განცხადებით, საოლქო საარჩევნო კომისიების დაკომპლექტება ნათესაური კავშირების გათვალისწინებით ხდება. ასევე, მმართველი პარტია ადმინისტრაციულ რესურს იყენებს.

"ხელისუფლება აგრძელებს საარჩევნო კომისიებში მათთვის სასურველი ადამიანების დანიშვნას.

გუშინ დასრულდა საარჩევნო კომისიების დაკომპლექტების ვადა და ხელისუფლება, ისევე როგორც სხვა ინსტიტუციებში, საარჩევნო კომისიებშიც კლანურ სისტემას ქმნის.

მაგალითად, გლდანის საოლქო საარჩევნო კომისიის თავმჯდომარე ნებაყოფილობით გადადგა და მის ადგილას დაინიშნა საბურთალოს რაიონის საოლქო საარჩვენო კომისიის თავმჯდომარის შვილი. ხოლო კომისიის მდივნად ყოფილი თავმჯდომარის ცოლი. საარჩევნო კომისიების დაკომპლექტება მოხდა ნათესაურ-მეგობრული კავშირებით. ამას ადასტურებს სხვა მასალებიც.

ჩვენს მიერ შესწავლილი ინფორმაციით, საჯარო სამსახურში მყოფი პირების ნათესავები დაინიშნენ 13 შემთხვევაში. წინა წლებში საარჩევნო ადმინისტრაციაში მმართველი პარტიის დანიშნული წევრები დაინიშნენ როგორც დამოუკიდებელი წევრები. 65 შემთხვევაში კი ადმინისტრაციული რესურსი იქნა გამოყენებული.

ყველა ეს შემთხვევა ჩვენს მიერ გასაჩივრდა ცენტრალურ საარჩევნო კომისიაში და შემდეგ სასამართლოში. თუმცა, ისევე როგორც წინა წლებში, ცესკო ამ საჩივრებს არ იხალავს, ან არ აკმაყოფილებს დაუსაბუთებლობის გამო" - განაცხადა კორძაიამ