კახეთში, წინანდალში, მომხდარი დაპირისპირებისას დაჭრილი ორი პირი თელავის ამბარაშვილის კლინიკაშია მოთავსებული.

როგორც კლინიკაში აცხადებენ, 29 წლის და 46 წლის მამაკაცების ჯანმრთელობის მდგომარეობა ამ მომენტისთვის სტაბილურია და მათ სიცოცხლეს საფრთხე არ ემუქრება.

მკურნალი ექიმის განმარტებით, 49 წლის მამაკაცის ჯანმრთელობის მდგომარეობა შედარებით მძიმეა და კლინიკაში რჩება, ხოლო 29 წლის მამაკაცი მალე გაეწერება.

"შემოვიდა თვითდინებით ორი პაციენტი. ერთს აღენიშნებოდა მარცხენა ბარძაყის ზემო მესამედში, უკანა ზედაპირზე, სავარაუდოდ, ცეცხლსასროლი იარაღით მიყენებული ჭრილობა. მოხდა მისი ქირურგიული დამუშავება. მდგომარეობა სტაბილურია განაგრძობს სტაციონალურ მკურნალობას.

მეორე პაციენტი, 29 წლის მამაკაცი, თვითდინებით შემოვიდა, აქვს სახსარში გამჭოლი ჭრილობა, მოხდა ჭრილობის ქირურგიული დამუშავება. სტაბილურია მდგომარეობა. სავარაუდოდ, პაციენტი გაეწერება. ჯერჯერობით დაკვირვების ქვეშაა და ალბათ დილისთვის გაეწერება.

ამ მომენტისათვის მათ სიცოცხლეს საფრთხე არ ემუქრება“, - განაცხადა ქირურგმა რატი ტურაშვილმა.

შეგახსენებთ, რომ დღეს , 16 აგვისტოს , თელავის რაიონის სოფელ წინანდლის ტყეში სამი ადამიანი ჩაცხრილეს. ერთ-ერთი ვერსიით, მკვლელობა ხე-ტყის ბიზნესს, ან ანგარიშსწორებას უკავშირდება.